İyülniñ 24-üne “Birlik motoyürüşi-2018” Ujgoroddan İlbav şeerine keldi. Bütün Ukrainadan baykerler Ukraina devlet bayrağı ve qırımtatar milliy bayrağınen Ternopil, Vinnitsa, Jitomir, Kıyiv, Poltava, Dnepr, Volnovaha, Mariupl şeerlerinden keçecek.
Aktsiya Hortitsa yarımadasında soñuna yetecek, bundan evel ise Çonğardaki Qırım memuriy sıñırında, Ukrainanıñ bütün bayker taqımlarnıñ adları ile imzalanğan, qırımtatar bayrağını yerleştirecekler.
“Biz öz birligimizni köstermege isteymiz: duşmanımız bizni ne qadar bölmege istese de, bunı becerip olamaz. Biz bayraqlarımıznı bütün memleketni dolaşıp, Çonğarda qırımtatar bayrağını yükseltirmiz”, - dep qayd etti motoyürüşniñ iştirakçısı Erfan Kudusov.
Ukrainanıñ birligine bağışlanğan motoyürüşke qırımtatar Milliy Meclisi de qoltuttı. Tedbirniñ iştirakçileri toqtalğan er şeerde olarğa yerli baykerler qoşula.
“Biz yürüşimizni iyülniñ 23-üne Ujgoroddan başladıq. Bugün İlbavda toqtaldıq. İnançlarımız, tilimiz türlü olğanına baqmadan, birlikte olğanımıznı bütün Ukrainağa köstermege isteymiz. Mototsiklcılar bütün yol devamında bizge qoşula, çareleri olğanı qadar mesafe keçeler”, - dey bayker Nikolay Spiridonov.
Baykerler “Birlik motoyürüşi”ni ekinci kere keçire. Bu sefer iştirakçiler bahşışlarnen ukrain askerlerini ziyaret etecekler.
Halqara teşkilâtlar Qırımnıñ işğal ve ilhaqını qanunsız dep tanıdı ve Rusiyeniñ areketlerini takbih etti. Ğarbiy memleketler bir sıra iqtisadiy cezalarnı kirsetti. Rusiye işğalni red ete ve öz amellerini “tarihiy adaletniñ ğayrıdan tiklevi” dep adlandıra. Ukrainanıñ Yuqarı Şurası, 2014 senesiniñ fevralniñ 20-sini Rusiye tarafından Qırım ve Aqyar vaqtıncalıq işğalniñ başlanuv künü dep resmiy olaraq ilân etti.