Rostov-na-Donu şeerinde bulunğan Rusiyedeki Şimaliy Kavkaz okrugınıñ arbiy mahkemesinde iyül 4-te Bağçasaraydaki «Hizb ut-Tahrir» gruppasınıñ işi boyunca qabaatlavnıñ şaatı sorğulandı. Bunı Qırım.Aqiqatqa advokat Emil Kurbedinov ikâye etti.
Kurbedinov: «Bu, cinaiy işniñ maiyeti boyunca birinci oturlışuv edi. Qabaatlav tarafı eki şaatnıñ sorğulanmasını planlaştırdı. Müftiniñ muavini Ayder İsmailov kelmedi. Tek bir şaat – Bağçasaray sakini keldi. O, (qabaatlanğan – QA) Enver Mamutovnı, Oraza bayramı ve Qurban bayramı vaqtında faal surette bayram şenliklerini teşkil etken vatandaş faaliyetçisi olaraq yahşı bilgenini ayttı. Prokuratura ep, qabaatlanğanlarnıñ ekstremistik teşkilâtına alâqası barmı, dep soray edi. Buña cevaben şaat «yoq», dey edi», – dep ikâye etti.
Nevbetteki oturışuv iyül 5-ke tayin etildi.
Onıñ aytqanına köre, bu, qabaatlav şaatınıñ Rusiye prokuraturası içün uyğun olğan ifadeler bermegeniniñ endi birinci misali degildir.
2016 senesi mayıs 12-de Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede dört Bağçasaray sakini: Zevri Abseitov, Remzi Memetov, Rustem Abiltarov ve Enver Mamutov yaqalanıp, terrorizmde qabaatlandı. Olarnı, Rusiyede terroristik tanılğan «Hizb ut-Tahrir» teşkilâtında iştirak etkenlerinden şübheli sayalar.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni yasaq etip, «terroristik» olaraq tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi din alâmetine köre yapıla, dep sayalar. Advokatlar, bu iş boyunca Rusiye uquqqoruyıcı organları tarafından taqip etilgenlerniñ esas olaraq qırımtatarlar olğanını ve olardan ğayrı İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd eteler. Halqara uquq işğal etilgen territoriyada işğalci devletniñ qanunlarını tatbiq etmekni yasaq ete.