Bağçasarayda «Qırım birdemligi» birleşmesiniñ koordinatorlarından biri Server Mustafayev ve Bağçasaray rayonınıñ Topçuköy (Dolinnoye) köyünde Edem Smailovda Rusiye telükesizlik hadimleri tintüvler keçire. Bunı «Qırım birdemligi» birleşmesi Facebookta bildire.
Faaliyetçilerniñ malümatına köre, Server Mustafayevniñ evi yanına avtozaknı (yaqalanğanlarnı taşımaq içün mahsus polis maşinası) ketirip qoydılar. Edem Smailovnıñ evinde ise üç bala blok etildi. Faaliyetçiniñ ömür arqadaşını evge yibermeyler.
Advokat Emil Kurbedinov, telükesizlik hadimleriniñ onı Mustafayevge yibermegenlerini bildirdi.
Qırım.Aqiqat olıp keçkenlerniñ tafsilâtlarını ögrenmek içün areket ete.
Qırım Rusiye tarafından ilhaq etilgen soñ mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübhe altında tutulğan Qırım musulmanlarınıñ evleri ketken sayın daa sıq olaraq kütleviy surette tintilmekteler.