Rusiyeniñ kontroli altında olğan Aqmescitniñ Merkeziy rayon mahkemesinde mayıs 14-te «fevral 26 işi»niñ maiyeti boyunca oturışuvda qabaatlanğanlar soñki söz ile çıqışta bulundı. Mahkeme ukmüni iyün 4-te çıqaracaq ola, dep bildire Qırım.Aqiqat muhbiri.
Advokatnıñ aytqanına köre, qabaatlav tarafı Ali Asanov ve Mustafa Degermenci içün 3 yıl ve 6 ay sınav muddeti ile şartlı olaraq 5 yılğa azatlıqtan marum etilmelerini ve işniñ diger figurantları içün aynı sınav muddeti ile şartlı olaraq 3 yıl ve 6 ayğa azatlıqtan marum etilmelerini istedi.
Mahkeme protsessi bitken soñ advokat Edem Semedlâyev, mahkeme binası yanına kelip iş figurantlarına qol tutqan Qırım sakinlerine ve tevqif etilgenlerniñ ailelerine qol tutqanlarnıñ episine minnetdarlığını bildirdi.
2014 senesi fevral 26-da Qırım Yuqarı Radası binasınıñ divarları yanında Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün bir gruppa qırımtatar faaliyetçilerine qarşı mahkeme 2015 senesinde başlandı.
Daa soñra mahkeme «Fevral 26 işi»ni ekige böldi: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyevniñ işinden ayırıldı.
2017 senesi oktâbr 25-te Rusiye ukümeti Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge keldiler.