Qırımtatar Milliy Meclisiniñ reisi Refat Çubarov qırımtatarlarnı, ilhaq etilgen Qırımda mayıs 18-de yarımadanıñ Rusiye ukümeti tarafından qırımtatar halqınıñ Qırımdan sürgün etilmesiniñ qurbanlarını anma kününe bağışlanıp teşkil etilecek tedbirlerde iştirak etmemege davet etti. Bunı Çubarov mayıs 5 künü aqşam özüniñ Facebooktaki videoblogında söyledi.
Çubarov: «Qırımtatar halqına qarşı er kün cinayet etken Rusiye işğalcileri mayıs 18-de… bu deşetli facia munasebeti ile bizim ile aynı şekilde matem tutqanlarını köstermege tırışaçaqlar. Yanıqlamaları sahte olacaq, olar bunı, bizlerni yuqlatmaq içün yapacaqlar. Cemaatımız arasından bazı satqınlar olarnen beraber olacaq. Men sizni, bu alçaqlarnı öz başına qaldırmağa davet etem», – dedi.
Qırımtatar Milliy Meclisiniñ reisi: «Bu künde, mayıs 18-de, biz birlikte, teşkil olunğan şekilde, yanımızda iç bir Rusiye işğalcisi ve olarnıñ hizmetçisi ve bunıñ kibi de Qırımnı bulaştırğan iç bir Rusiye bayrağı olmadan, halqımız işğalden evel tiklegen eykeller yanına kelip, anda dualar oqumaq kerekmiz», – dep ilâve etti.
Qırımdan qırımtatar halqınıñ sürgüni qurbanlarını hatırlama künü er yıl mayıs 18-de qayd etile. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etilgen edi.