Rusiyedeki Sankt-Peterburgnıñ Petrograd rayon mahkemesi qırımtatar faaliyetçisi Asan Mumcini yedi künge azatlıqtan marum etilüvge mahküm etti. Bunı Qırımtatar Milliy Meclisiniñ reisi Refat Çubarov bildirdi.
Onıñ bildirgenine köre, mayıs 1 numayışında çetel memleketlerine ait bayraqlarnıñ qullanılması, şeklen tevqif içün sebep oldı.
Çubarov: «Asan Mumciniñ, Sankt-Peterburgdaki diger az sayılı faaliyetçileri ile birlikte Putinniñ rejimine qarşı ve qırımtatar siyasiy mabüslerine qol tutuv maqsadınen yapılğan tedbirlerde daima iştirak etkeni, tevqif etilmesiniñ kerçek sebebi olğanı, er kes içün aşkârdır», – dedi.
Al-azırda Rusiyeniñ resmiy tahqiqat organları tarafından Rusiyede qırımtatar faaliyetçisi Asan Mumciniñ tevqif etilmesi aqqında malümat berilmedi.
Bundan evel Sankt-Peterburgdaki qırımtatar toplulığınıñ vekili Asan Mumci, cemiyet içinde yapılğan qırımtatar halqına qol tutuv tedbirlerinde iştirak etti.