Qırımtatar Milliy Meclisiniñ reisi, Yuqarı Radanıñ deputatı Refat Çubarov, ilhaq etilgen Qırımda içinde ekisi qırımtatar olğan dört kişiniñ ölümi munasebeti ile yardım soray.
Çubarov Facebookta: «Aqmescitniñ tahqiqat izolâtorında dört mabüsniñ, ve şu cümleden Server Bilâlov (69 yaşında) ve İslâm İskerovnıñ (39 yaşında) zorbalıq neticesindeki ölüm vaqiaları aqqında malümat, obyektiv olğanına oşay. Server Bilâlov ve İslâm İskerovnıñ vaqtınca işğal etilgen Qırımda yaşağan aqrabaları ile bağlanmağa yardım etkenlerniñ cümlesine minnetdar olurmız», – dep yazdı.
Aprel 19-da «Qırım insan aqlarını qorçalav gruppası» (QİG), Aqmescitteki 1-nci nomeralı Tahqiqat izolâtorında dört kişiniñ tabiiy olmağan tarzda ölgenini bildirdi.
Aq-uquq qorçalayıcıları: «QİGde, ihtimal ile aprel 6-da 69 yaşındaki Server Bilâlov ve 46 yaşındaki Oleg Gonçarovnıñ asılğan alda tapılğanları aqqında malümat bar. Aprel 12-de ceza izolâtırında (kartserde) 23 yaşlı Dmitriy Şipovnik asılğan alda tapıldı.
Aprel 13-te yañı kelgenler yerleştirilgen 8 nomeralı kamerada kesilgen boğaz ile Aqmescitke Canköyden ketirilgen 39 yaşlı İslâm İskerov tapıldı.
Aq-uquq qorçalayıcılarnıñ sözlerine köre, olar, bu adamlarnıñ ölümi içün neler sebep olğanını bilmeyler. Lâkin olar, ölülerniñ özlerni öldürgenlerine dair tahminniñ qandırıcı olmağanını sayalar.