Rusiye tarafından ilhaq etilgen Qırımda mustaqil KHV yoq. Mevcut olğan media vastaları haber bildirmek yerine propaganda vazifesini becereler. Bunı «Qırım KHVleri inkişafınıñ tarihı ve işğal etilgen Qırımda söz serbestliginiñ zemaneviy vaziyeti» mevzusındaki «tögerek masa»nıñ iştirakçileri bildirdi.
Qırımtatar Milliy Meclisiniñ azası, «Qırım haberleri» agentliginiñ baş muarriri Gayana Yüksel, al-azırda yarımadada söz serbestligi yoq, mustaqil jurnalistler vazifesini ise üstüne cemiyet faaliyetçileri aldı, dep qayd etti.
Gayana Yüksel
Qırımtatar Milliy Meclisiniñ reisi Refat Çubarovnıñ aytqanına köre, zemaneviy media vastalarınıñ rolü yalıñız haber bermek ile degil, aynı zamanda ahlâq saası ile de alâqalıdır.
Çubarov: «Er şey rejimge bağlı. Biz Ukrainanıñ qıtadaki qısmında ve işğal etilgen territoriyalarda jurnalistlerniñ faaliyetini qıyas ete bilemiz, lâkin esas sual kene de: «İnsanlarğa eyilik ve sevgini aşlamaq, olarnı bu printsiplerni qorçalamağa ögretmek içün jurnalistler nasıl rol oynay?», – dedi.
Aprel 10-da Ukraina jurnalistleri milliy birliginiñ konferents-zalında «Terciman» qırımtatar gazetasınıñ birinci nomerası çıqqanına 135 yıl toluvı ve Qırımtatar jurnalistikası künü munasebeti ile «tögerek masa» keçti.
Volodımır Pritula
Tedbirde Qırım jurnalistleri, aq-uquq qorçalayıcıları ve Qırımtatar Milliy Meclisiniñ azaları ilhaq etilgen Qırımda söz serbestligi saasındaki vaziyetni, yarımadada vatandaş jurnalistlerine qol tutuv ve qırımtatar kütleviy haber vastalarını inkişav ettirüvni muzakere ettiler.
İlmi Umerov
Qırımtatar jurnalistikası kününi 2011 senesi aprel 10-dan başlap qayd etmege başladılar. Bu qarar Bağçaraydaki qırımtatar kütleviy haber vastalarınıñ konferentsiyasında alınğan edi. Birinci qırımtatar devriy neşiri – maarifçi İsmail Gasprinskiyniñ «Terciman» gazetası 1883 senesiniñ tamam aprel 10 kününde dünya yüzüni kördi.
Your browser doesn’t support HTML5
Газета «Терджиман» | Истории об истории (видео)