Belli olmağan şahıslar, Çernihivde Ukraina musulmanlarınıñ birligi (AMU) tarafından kiralanğan binanıñ divarlarına haçlarnı sızdı. Bunı Qırım.Aqiqatqa Çernihivteki AMU cemaatınıñ rehberi Abdulla Kolomiyets bildirdi.
Onıñ sözlerine köre, namaz odasınıñ qapısı ve divarlarında qara boya ile sızılğan haçlardan ğayrı, belli olmağan şahıslar qapı yanında, üstüne skoçnen Meryem Ana ve İsa Peyğamberniñ resimleri yapıştırılğan tola qardıldılar.
Kolomiyets, polis hadimleri adise yerini közden keçirip teşkerdiler, dep bildirdi. Ondan ğayrı, böyle teşkerüv Ukraina Telükesizlik hizmetiniñ Çernihiv vilâyetindeki idaresiniñ hadimleri tarafından yapıldı. Kolomiyets olıp keçken adisege, dinler arasında zıddiyet doğurmaq maqsadınen yapılğan vandalizm aktı, dedi, yaza muhbir.
İmam, Qırım.Aqiqat içün bergen izaatta: «Kimdir farqlı dinlerni kütken insanlarnı bir-birine qarşı qoymaq istey… Biz, munasip organlarnıñ bu işni tahqiq etmelerini, öz işini yapmalarını ve böyle şeylerniñ ileride tekrarlanmamasını isteymiz», – dedi.
Belli olmağan şahıslar Ukraina musulmanlarınıñ birleşmesi tarafından Çernihivde kiralanğan binada haçlar sızdı
2016 senesinde Kyivdeki AMU binasında belli olmağan şahıslar İslâmğa qarşı yazı ile svastika resimini qaldırdılar.
AMU, Ukrainanıñ qıtadaki qısmına köçken Qırım musulmanları ve olarnen birlikte diger bölgelerden olğan dindaşları tarafından meydanğa ketirildi. Aynı zamanda Qırım Muhtar Cumhuriyeti musulmanlarınıñ diniy idaresi yanındaki ulemalar şurasınıñ başlığı olğan Suleyman Hayrullayev AMUnıñ başlığı ola.