Qırım aq-uquq qorçalayıcıları gruppasınıñ eksperti İrina Sedova, Qırımdaki Rusiye ukümetiniñ «media-gvardiya» çerçivesinde yarımadanıñ yaş sakinlerini «yahşı haberler»niñ yazılmasına celp etmek niyeti, ayatnıñ bütün saalarını umumen askeriyleştirüv tendentsiyasına uyğun kele, dep saya. Bu fikirni o, Qırım.Aqiqat Radiosı efirinde ifade etti.
Aq-uquq qorçalayıcısı: «Men şuurnıñ askeriyleştirilmesi boyunca tetqiqat yapqanda, buña er seviyedeki büdjetlerden qocaman paralarnıñ ayırılğanını kördim. Gençlerni türlü yollarnen Rusiye ordusında ve şimdi endi nasıldır propaganda quvetlerinde, «media-gvardiya»da hizmet etmege meyil ettireler. Bu işte eñ emiyetlisi, Rusiye ukümeti individuallikni silmek, kritik şekilde fikirlep olmağan nesilni yetiştirmek istey. Balalar askeriy tedbirlerde iştirak etkende olar uniforma kiyip, saf-saf yüreler. Bütün bular nefret propagandası, duşmanlıq tili ile taqip etile», – dep qayd etti.
Ukraina psihologı Larisa Voloşinada balaları Rusiye propagandasınıñ tesiri altında olğan ana-babalar içün bir qaç tevsiye bar: «Ana-baba balalarına tazyıq etmemeli – olar yavaştan umum insaniy degerliklerini añlatmaq, kritik olmağa, neticeler aqqında tüşünmege ögretmek kerekler. Yardım, qorçalav içün balanıñ içtimaiy ağlardaki esaplarına irişüvge saip olmaq yahşı olur edi, lâkin yalıñız onıñ razılığı ile. Eger balanıñ ana-babası özleri de yolnı şaşırtqan ve propagandağa inanğan olsalar, ösmür olarnen qızğın davalar yapmamalı. O, olsun bediiy tögerek, ya da menfaatlar boyunca başqa bir birleşüv kibi, maneviy ceetten özüne yaqın olğan muitni qıdırmaq kerek».
Bundan evel «Novıy den» haber agentligi, Kremlniñ kontroli altında olğan Qırım memurları genç Qırım sakinlerini İnternette ilhaq etilgen Qırım aqqında «propagandanıñ yalanlarını faş etmek» içün celp etmek isteyler, dep bildirdi.
Qırımdaki Rusiye tasil, ilim ve gençlik naziriniñ muavini Konstantin Alikin, yarımadanıñ ayatı aqqında yahşı haberlerniñ yoqluğı – yerli KHVlerniñ eñ esas problemalarından biridir, ve onı tamam «media-gvardiya» yoq etmege yardım etecek, dep iddia ete.