Mart 27-de Kyivde, yañı sanktsialar cedveliniñ ilân etilmesi içün sebep ola bilecek ilhaq etilgen Qırımda Rusiye tarafından Ukrainanıñ radio sıqlığı resursınıñ zapt etilmesi aqqında esabat taqdim etildi.
Esabatnı Televideniye ve radio yayınlav boyunca milliy şura ve Ukraina İnformatsion siyaset nazirligi azırladılar.
Televideniye ve radio yayınlav boyunca milliy şuranıñ rehberi Yuriy Artemenko: «Esabatnıñ neşir etilmesi – Ukrainanıñ teleradioinformatsion saasını imaye etmek maqsadınen «ekinci cebhe»niñ açıluvıdır. Menim fikrimce, bu vesiqa yañı sanktsion cedvellerniñ esasını teşkil ete bilir. Rusiye «sahte media»ları ve olarnıñ rehberleri bu cedvellerniñ figurantları olacaqlar. Çünki informatsion işğalniñ neticesinde yarımadada yaşağan 2,5 million Ukraina vatandaşı informatsiyağa serbest irişüv ve türlü menbalardan doğru informatsiyanı aluv aqlarından marum etildi», – dep qayd etti.
O, 2015 senesinden başlap, Milliy şura İnformatsion siyaset nazirliginen birlikte «kontrol altında olğan ve vaqtınca işğal etilgen territoriyalarda Ukraina yayınlarını sistematik şekilde inkişaf ettire», dep hatırlattı.
Yarımadadanıñ territoriyasında Ukraina telekanalları ve radiostantsiyalarınıñ efirde yayıluvı 2014 senesi – 2015 senesiniñ birinci yarısında tolusınen toqtatıldı.
Milliy şura ve İnformatsion siyaset nazirliginiñ malümatına köre, Qırımnıñ Rusiye tarafından işğali neticesinde yarımadada 39 Ukraina radiostantsiyası ve 31 Ukraina telekanalı yayınlav imkânını bütünley ğayıp etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.