Rusiyeniñ kontroli altında bulunğan Aqmescitniñ Kyiv rayonı mahkemesi martnıñ 2-sinde Bağçasaraydaki «Hizb ut-Tahrir işi» figurantları Zevri Abseitov, Remzi Memetov, Rustem Abiltarov ve Enver Mamutovğa iş materiallarınen tanış oluv vaqtını martnıñ 14-ne qadar sıñırladı. Bunı Qırım.Aqiqatqa advokat Emil Kurbedinov söyledi.
Kurbedinov: «Mahkeme işnen tanış oluv içün berilgen vaqtını martnıñ 14-ne qadar sıñırladı. Qanun boyunca iç bir sıñırlamalar yoq. Tahqiqatçı advokat ya da qabaatlanğan şahısnıñ aselet vaqıt uzatqanını körse, o, munasip ariza bermek mumkün. Biz, tarafımızdan iç bir qasten vaqıt uzatuv olmağanını sayamız. Tanış oluvnıñ uzun vaqtı, tahqiqat tarafından tayin etilgen rejimnen alâqalıdır. Biz yetiştirmesek, olar ep bir tanışuvnı qapatacaqlar», – dedi.
Advokatnıñ aytqanına köre, berilgen vaqıt tanış oluv içün yetmemek mumkün.
«Yahşı bir şekilde, tanış oluvnıñ normal rejiminde qararnen 20 kün kerek. Aftada bir ya da eki kere olsa, daa eki ay kerek olacaq», – ilâve etti o.
Fevralniñ 8-nde Kremlniñ kontroli altında bulunğan Qırımnıñ Yuqarı mahkemesiniñ oturışuvında Bağçasaraydaki «Hizb ut-Tahrir işi» figurantları Zevri Abseitov, Remzi Memetov, Rustem Abiltarov ve Enver Mamutovnıñ tevqif muddeti uzatıldı.
2016 senesi mayısnıñ 12-sinde Bağçasarayda Rusiye telükesizlik hadimleri musulmanlar, qırımtatarlarnıñ evlerini ve yerli qavehaneni tinttiler. Neticede dört bağçasaraylı: Zevri Abseitov, Remzi Memetov, Rustem Abiltarov ve Enver Mamutov yaqalanıp, terrorizmde qabaatlandı. Olarnı, Rusiyede terroristik olaraq tanılğan «Hizb ut-Tahrir» teşkilâtında iştirak etkenlerinde şübheli sayalar.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi din alâmetine köre yapıla, dep sayalar. Advokat Emil Kurbedinov, bu iş boyunca Rusiye uquqqoruyıcı organları tarafından esas olaraq qırımtatarlar ve olardan ğayrı İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenlerini qayd ete.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni yasaq etip, «terroristik» olaraq tanılğan 15 birleşmeniñ cedveline kirsetti.
Qırımnıñ Rusiye tarafından ilhaqından soñ mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübhe altında tutulğan Qırım musulmanlarınıñ evlerinde ketken sayın daa sıq surette kütleviy tintüvler yapıla.