Aqmescitteki «Hizb ut-Tahrir işi» boyunca tevqif etilgen Rustem İsmailov tutulğan Aqmescit muvaqqat izolâtorınıñ ücrelerinden birinde tavannıñ bir qısmı qopıp tüşti. Bunı Facebookta figurantnıñ ömür arqadaşı Fatma İsmailova bildirdi.
İsmailova: «2017 senesi dekabr 26 salı künü Aqmescitteki muvaqqat izolâtornıñ 68-nci ücresinde endi bir yıldan ziyade tutulğan ömür arqadaşım Rustem İsmailovnıñ üstüne tavan yıqıldı. Qararnen 1 kv. m. ölçüsinde olğan tavannıñ parçası qopıp, Rustemniñ tamam başına kelip tüşti», – dep yazdı.
Onıñ yazğanına köre, tevqif etilgen şahıs «mañlay, baş ve arqasındaki tırnalğan yaralar ile qurtuldı». İsmailova, adiseniñ neticesinde ömür arqadaşı, 12 yataq ve 18 kişi bulunğan diger bir ücrege keçirildi, dep iddia ete.
Qırım akimiyeti tarafından bu hususta açıq menbalarda berilgen izaatlar yoq.
Daa evel Kremlniñ kontroli altında bulunğan Qırım Yuqarı mahkemesi, Aqmescitteki «Hizb ut-Tahrir işi» – figurantları Emil Cemadinov, Ayder Saledinov, Rustem İsmailov ve Teymur Abdullayev muvaqqat izolâtorda 2018 senesi fevralniñ 11-ne qadar qalacaqlar, dep qarar berdi.
2016 senesi oktâbrniñ 12-sinde Qırımda beş musulman qorantasında tintüvler yapıldı. Neticede, Rusiye ve onıñ tarafından ilhaq etilgen Qırımda yasağlanğan «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov tevqif etildiler.
Fevralniñ soñunda Rustem İsmailov ve Ayder Saledinovnı psihiatrik ekspertizağa yollağanları belli oldı.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi din alâmetine köre yapıla, dep sayalar. Advokat Emil Kurbedinov, Rusiye uquqqoruyıcı organları tarafından bu iş boyunca esas olaraq qırımtatarlar taqip etilip, olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruplarğa ait Qırım sakinleriniñ de taqip etilgenini qayd ete.
Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.