Kyivde qırımtatar tarihına ukrain baqışı aqqında «Azat Qırım ya da Moskvanıñ mustemlekesi? İmperatorlıqnıñ genotsidi ve qırımtatar inqilâbı» («Azat Qirim або колонія Москви? Імперський геноцид і кримськотатарська революція») kitabı taqdim etildi.
Kitapnıñ muellifleri – Kyiv publitsisti, Azatlıq Radiosı ve Qırım.Aqiqat muellifi Serhiy Hrabovskıy ve Kyiv-Mohıla akademiyasınıñ medeniyetşınaslıq bölügi dotsenti aqyarlı İgor Losev.
Hrabovskıy dekabrniñ 20-sinde Qırım.Aqiqat içün bergen izaatta kitap aqqında: «Bu kitap – qırımtatar tarihı ve asırlar devamındaki Rusiye İmperatorlığınıñ mustemlekeci siyasetine ukrain baqışıdır. Ve bu imperatorlıqnıñ tesiri ile yarımadada gizlice ve soñ asırlarda bütünley açıq surette ömürge keçirilgen genotsidge de ukrain baqışıdır», – dep ikâye etti.
Kitapta «Ukrainanıñ qırımtatar halqı ögündeki borcu» meselesi de ortağa qoyula, dey Hrabovskıy.
O: «Bizni kitapnı yazmağa ne mecbur etti? Bizim Qırmnen alâqamızdır. İgor Losev doquzıncı nesilde qırımlı. Men bir muddet yarımadada yaşadım. Bu, bizge Ukrainanıñ qırımtatarlar ögünde belli bir borcu olğanı aqqında söylemege imkân bere. Ukraina devlet seviyesinde yapacaq olğan şeylerni bir qaç kere yapmadı. Ve biz bunı açıqtan yazamız», – dep ilâve etti.
Kitap ukrain tilinde neşir etildi.
«Azat Qırım ya da Moskvanıñ mustemlekesi? İmperatorlıqnıñ genotsidi ve qırımtatar inqilâbı» kitabı