Ukrayina prezidenti Volodımır Zelenskıy fevralniñ 20-nde Ukrayina eyyetinen Jenevadaki muzakereler boyunca körüşüv keçirdi – bu aqta o, jurnalistlerge bildirdi.
Onıñ aytqanına köre, körüşüv bir buçuq saat devam etti ve İsviçredeki üç taraflı muzakerelerniñ netcelerinen bağlı edi.
"Diqqat etken ilk şeyim – arbiy alt gruppada konstruktiv bar, dep tüşünem. Üç taraf da cenk bitse, ateş toqtatılsa, ateş toqtatıluvınıñ monitoringini birinciden amerikalılar yapacaq, dep razı oldı. Olar bu yönelişte reis olacaqlar. Mence, taqımnıñ bugün ketirgen pek müim netice oldı", – dep bildirdi Zelenskıy.
Bundan ğayrı, devlet yolbaşçısı siyasiy alt gruppanıñ gumanitar trekinde, hususan reinelerni deñişüv muzakeresinde añlaşmalar aqqında bildirdi:
"Şimdilik pozitiv aqqında aytmaq erte, amma konstruktiv tapıldı, yaqın künleri deñişüv keliştirilecek, sayısı ve vaqtı – Ukrayina cenk esirleriniñ Rusiye cenk esirlerine deñişüv".
Aynı vaqıtta, "daa az konstruktiv", Zelenskıynıñ aytqanına köre, siyasiy alt gruppada, Donbas ve topraq meselesinde körüne. O, mında konstruktiv qararlar daa tapılmadı, dep qoştı.
Ukrayina prezidenti taraflar 10 kün içinde yañı körüşüv aqqında añlaştı, o da Jenevada keçecektir, dep qoştı.
O, körüşüv keçirilüvine müsbet qıymet kesip, Amerika tarafına teşekkürler bildirdi.
"Ateş toqtatıluvınıñ monitoringi ve ola bilecek deñişüv qararlarınıñ olması endi pek yahşı, hususan deñişüv esnasınen bağlı şeyler. Topraq meselelerinde kimse pozitiv körmey, bu da doğru ve bunı qabul etmek kerekmiz", – dedi o.
Zelenskıy yaqın eki künde muzakere taqımınen esas meselelerni ve kelecek körüşüv içün mandatnı muzakere etmege planlaştıra, dep qoştı.
Zelenskıy telegram kanalında ABD vekilleri "muzakereler konstruktiv olsun dep", elinden kelgenini yapalar.
"Taqımğa direktivalar çerçivesinde tam iş içün minnetdarım, em de Rusiye tarafınen bütün subetlerde, em de pek adiy olmağan ve zor körüşüvlerde sabırları içün minnetdarım", – dep qoştı o.
Jenevada fevralniñ 17-nde ve 18-nde devam etken muzakereler – soñki ayda ötkerilgen üç taraflı körüşüvlerniñ üçünci raundı – Rusiyeniñ Ukrayinağa qarşı cenkni toqtatuv yolunda eki zor maniağa bağışlandı: topraq iddiaları ve telükesizlik kefaletleri.
Körüşüvler Rusiyeniñ büyük istilâsınıñ dördünci yılına bir afta qalğanda keçti.
ABD cenkni bitirüvde aracı olmağa ğayret kösterse de, Rusiye sert talaplarından, şu cümleden Ukrayinanıñ Donbas toprağından vazgeçmesine azır olğanını köstermedi.
Ukrayina ABD ve Avropa ittifaqdaşlarından onı Rusiye istilâsından qorumağa yardım etecek küçlü telükesizlik kefaletlerini talap ete.