Moskva, Kyiv ve Washingtoniştirakinen Rusiye-Ukrayina cenkini toqtatuv muzakereleri Yaqın Şarqtaki uruş areketleri sebebinden toqtadı, dep bildirdi Ukrayina prezidenti Volodımır Zelenskıy martnıñ 4-nde aqşam.
Onıñ aytqanına köre, Ukrayina vekilleri ABD vekilleriinen "aman-aman er kün laf etmege" devam ete.
"Şimdi İran etrafında olğan vaziyetten sebep üç taraflı körüşüv içün kerekli işaretler daa yoq. Amma telükesizlik ve umumiy siyaset vaziyeti üç taraflı, diplomatik işni devam ettirmege imkân bergen vaqıt bu yapılacaq. Ukrayina buña azır", – dep qayd etti Ukrayina lideri.
Ukrayina, Rusiye ve ABD 2026 senesi başlanğanınen üç taraflı muzakerelerniñ bir qaç raundını keçirdi. Yanvar ayında ve fevralniñ başında eyyetler Abu-Dabide körüşti, fevralniñ ortasında muzakereler Jenevada oldı.
Yañı körüşüv martnıñ başında Abu-Dabide keçer, dep beklenile.
Körüşüv aqqında Yaqın Şarqtaki uruş areketleri başlamazdan evel añlaşqan ediler. ABD İranğa darbe endire. Tehran İsrail, Amerika arbiy bazaları ve Basra körfezindeki memleketlerde elçihanelerine ücüm ete.