Rusiye arbiyleri sentâbrniñ 18-ne keçer gecesi Ukrayinağa 93 darbe uçucısızı, hususan 46 Shahed reaktiv dronınen ücüm etti, dep bildirdi Ukrayina Silâlı quvetleriniñ Ava küçleri. Bir qısmı Qırımnıñ Sarabuz qasabasından uçurıldı.
“İlk malümatqa köre, saat 08:00-ge qadar ava mudafaası Shahed, Gerber, diger dronler olğan 69 duşman uçucısızını ve 3 “Banderol”/“Dan-T” urdı/bastırdı”, – dep aytıla haberde.
Ukrayina Silâlı quvetleriniñ Ava küçleri malümatına köre, 13 yerde ücüm qayd etildi, üç yerde parçalar tüşti.
“Bundan ğayrı, duşman vastalarınıñ bir qısmı maqsadına irişemedi, malümat alına. Ücüm devam ete, ava boşluğında duşman uçucısızları bar”, – dep qoştı arbiyler.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.