ABD ve Rusiye ile üç taraflı muzakerelerde Ukrayina eyyetiniñ yolbaşçısı olğan, Milliy telükesizlik ve mudafaa şurasınıñ (MTMŞ) kâtibi Rustem Umerov Jenevada Rusiyeniñ Ukrayinağa qarşı cenkni bitirüvnen bağlı eki künlik körüşüvden soñ bazı meselelerde ilerilev olğanını ayttı.
"İntensiv ve tam iş oldı. Amerikalı ortaqlarımızğa esnas toqtamayıp devam etkeni içün minnetdarmız. İsviçre tarafına musafirçenlikleri ve ayırğan yerleri içün minnetdarmız. Eyyetler siyasiy ve cenk blokları çerçivesinde çalıştı. Telükesizlik parametrleri ve ola bilecek qararlarnıñ mehanizmlerini muzakere ettiler. Bazı meseleler çezildi, bir qısmı – devam ete. Esnasnı bitirmek içün kerek olğan esas maddelerge emiyet beremiz. Bu qıyın iş, bütün taraflar añlaşmalı ve vaqıt kerek. İlerilev bar, amma şimdilik tafsilâtsız", – dep qayd etti Umerov.
Onıñ aytqanına köre, nevbetteki adım – belgilengen qararlarnı prezidentlerge taqdim etmek içün "kerekli añlaşma seviyesine irişilmeli".
"Bizim vazifemiz – formal degil, kerçek bir temel azırlamaq. Ukrayina konstruktiv bir şekilde çalışa. Maqsadımız deñişmey – adaletli ve turğun bir barışıq", – dep qoştı MTMŞ kâtibi.
Ukrayina prezidenti Volodımız Zelenskıy ABD aracılığıgnen Rusiye vekillerinen körüşüvler Jenevada "qolay olmadı", dep bildirdi. Zelenskıy bunı jurnalistlerge Ukrayina gruppasınıñ İsviçrede eki kün devam etken muzakerelernen bağlı maruzasından soñ ayttı.
Zelenskıy muzakerelerniñ ilk kününi izaatlap, Rusiye endi finalğa çıqacaq olğan muzakerelerni sozmağa tırışa.
Moskvanıñ muzakerecisi, Rusiye prezidentiniñ yardımcısı Vladimir Medinskiy Rusiye devlet kütleviy haber vastaları ögünde çıqışta bulunıp, muzakereler "qıyın, amma iş" oldı ve körüşüvler devam etecek, dep ayttı.
Jenevada fevralniñ 17-nde ve 18-nde devam etken muzakereler – soñki ayda ötkerilgen üç taraflı körüşüvlerniñ üçünci raundı – Rusiyeniñ Ukrayinağa qarşı cenkni toqtatuv yolunda eki zor maniağa bağışlandı: topraq iddiaları ve telükesizlik kefaletleri.
Körüşüvler Rusiyeniñ büyük istilâsınıñ dördünci yılına bir afta qalğanda keçti.