NATO Baş kâtibi Yens Stoltenberg, Şimaliy Atlantik intifaqına ihtiyac deñişmegenini tüşüne, buña bir nümüne olaraq Qırımnıñ 2014 senesi Rusiye tarafından işğal etilmesini ketirdi. Böyle iddia ile o, cumaaqşamı Avropa Köleciniñ studenleri ögünde çıqışta bulundı.
«Bu küç yolunen sıñırlarnı deñiştirmege ıntıluv. Bir qaç yıl evelsi Qırımda olğanı kibi. Em eski, em yañı telükelerge qarşı turmaq içün uyğulaşmağa devam etmelimiz», – dedi o.
.@jensstoltenberg: "This attempt to redraw borders by force, as we have seen in Crimera, happened only a few years ago. Therefore, the need for NATO has not changed. We must continue to adapt to address challenges both old and new." #NATO #IRD #coe #collegeofeurope
— College of Europe (@collegeofeurope) March 4, 2021
Evel Ukraina prezidenti Volodımır Zelenskıy NATO Baş kâtibi Yens Stotenberg ile telefon qonuşması vaqtında, Ukraina NATO-nıñ Qara deñiz bölgesinde artmasını istegenini bildirgen edi.
Volodımır Zelenskıy Yens Stoltenbergni "Qırım platforması"nıñ tesis sammitinde iştirak etmege ve Ukraina Mustaqilliginiñ otuzıncı yıldönüminiñ qayd etilmesinde iştirak etmege davet etti.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.