Aprelniñ 27-nden 28-ne keçer gecesi Aqyar ve Qırımnıñ rayonları dron ücümine oğradı, küçlü patlavlar oldı, Rusiye ava mudafaası çalıştı.
Aqyarda aprelniñ 27-nden 28-ne qadar gecesi ava mudafaası bir qaç kere ilân etildi. Rusiye kontrolindeki şeer yolbaşçısı Mihail Razvojayev içtimaiy ağlardaki saifelerinde uçucısız ücümi aqqında bildirdi: "Aqyarda arbiyler, ava mudafaası ve mobil ateş gruppaları Ukrayina Silâlı quvetleriniñ ücümini keri qaytardı. Umumen Hersones, Omega ve Şimaliy tarafta 14 uçucısız urıp tüşürildi". O, Sofya Perovskaya ve Lübimovka civarlarında uçucısız parçalarınıñ yolğa tüşkenini de bildirdi.
"Krımskiy veter" telegram kanalı abunecileriniñ malümatına esaslanıp, Kefede (22:21), İslâm Terek rayonında (22:52), Novofedorovkadaki "Saki" uçaq alanında (23:50 ve 00:17), Aqyarda (0:23) ve "Kaça" uçaq alanında (00:17) atış aqqında bildirdi.
Rusiye monitoring kanalları Canköy, Aqşeyh, Bağçasaray, Qurman, Aqmescit rayonları (Tavrik issilik elektrik stantsiyası), Balıqlava (Balıqlava issilik elektrik stantsiyası), İnkerman, Kezlev, Kefe, Saq, Novofedorovka, Aluşta, Canköyde uçucısız ücüm ve dron telükesi sebebinden ava telükesi aqqında yazdılar.
Rusiye Mudafaa nazirligi "nevbetçi ava mudafaasınıñ vastaları Astrahan, Volgograd, Rostov, Kursk vilâyetlerinde, Krasnodar ülkesi, Qırım Cumhuriyeti ve Qara ve Azaq deñizleri üzerinde 186 ukrayin uçucısızını yoq etti", dep esabat berdi.
Ukrayina arbiyleri haber derc etilgende vaziyetni izaatlamağan edi.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.