Andrey Eyderniñ ögey anası, Qırım yanında rusiye quvetçilerinen deñizde tutulğan ukrain deñizciniñ sağlıq alı aqqında haber etti. Yevğeniya Eyder öz Facebook saifesinde, tünevin Andrey ameliyat keçirdi dep bildirdi. “Saat 08:35-ke olğan malümatıma köre - Anrey tünevin aqşam kezgen qızına telefon etti. Çoq şey aytmadı - ameliyat keçirdi, hastahanede yata, er şey yahşı - dep ikâye etti”, - yazdı Yevgeniya Eyder.
Daa evel haber etildi ki, Kreml nezareti altında Aqmescitniñ Kiyev rayonı mahkemesinde noyabr 25-inde tutulğan ukrain deñizcileriniñ cezasını tayinlenecegi bildirildi.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Your browser doesn’t support HTML5
Захват украинских кораблей у берегов Крыма. Как это было (видео)
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Aqşamğa yaqın Rusiye ukrain gemilerini keçirdi, amma birazdan atışlar aqqında belli oldı. Ukraina Arbiy deñiz quvetleriniñ malümatına köre, ücüm neticesine altı ukrain arbiyi yaralandı. Rusiyede silâ qullanuvını tasdıqladılar ve üç yaralanğan ukrain deñizcisi aqqında haber ettiler.
Ukraina Yuqarı Radası, noyabr 26-sında aqşam bir sıra vilayette Azaq ve Qara deñizleriniñ içki suvlarında cenk vaziyetini ilân etti.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
Soñki vaqıtları Azaq deñizi Rusiye uquq qoruyıcıları, birinciden Ukraina limanlarına ketken ve andan kelgen gemilerni tutqan sıñırcıları, tarafından yapılğan provokatsiyalarnıñ yeri oldı.