“Qırım titanı” zavodı ekşilik toplağıçınıñ yel tarafından cihazlar azamiy maqbul qoyulanmasından defalarca yükselgen Kükürt angidridiniñ kölemini kösterdi dep haber etti Qırım.Aqiqat Radiosına Qırım ekologik esenlikmerkeziniñ reberi Anton Kovalçük.
“Biz ekşilik toplağıçına yel esken taraftan yaqınlaşqan soñ, anda köstergiçler kerçekten pek büyük edi, normadan tış çıqtılar, atta cihaz qayd ete bilecek sıfırdan yüksek edi. Kükürt angidridi havflı kölemde edi. Cihazımız eñ çoqu - 20 milligram bir mert kubğa köstere, mında ise 1 milligramlıq azamiy maqbul qoyulanmasından artqaç edi”, - dep qayd etti ekolog.
Kovalçüknıñ aytqanına köre, ekşilik toplağıçınıñ bütünley quruğanı birden köründi. Yağanaqlar zararlı buvlarnı yerge qaytarmaq kerek, ekşilik yağmırları ise bu alda yağmamaq kerek dep tüşüne ekolog.
“Yağğan yağmırlarnıñ büyük kölemini diqqatqa alsaq, olar sağlıqqa zararlı olacağından qorqmaq kerekmey. Biş teşkerdik, Aqmescitkece kelip yetken yağmırlarnıñ terkibinde ekşilik normadan tış çıqmay”, - dep bildirdi Kovalçuk.
Birinci bilinmegen taşlamalar avgustnıñ 23-ünden 24-üne gecesi qayd etildi. Bir gecede Ermeni Bazar şeeri ve yaqın köylerde qora, ev damları, aletler ve ösümlikler üstünde yapışaq yeşil pas peyda oldı ve avada keskin ekşilik qoqusı sezile edi.
Sentâbrniñ 4-ünde saba Ermeni Bazar mektepleriniñ müdirleri, birinci sınıf talebeliniñ ana-babalarına telefon etip, şeerden tış çıqacaqları aqqında haber etti. Balalarnen beraber analar da sanatoriylerge yollanılacaqları aqqında aytıldı. 2-11 sınıf talebeleri ise özleri ketmek kerek edi.
Qırımnıñ şimalinde zararlı taşlamalarnıñ kölemi normadan tış çıqtı. Qırımnıñ rusiyeli başlığı Aksönovnıñ aytqanına köre, “Qırım titanı” zavodınıñ işi eki aftağa toqtatıldı.