Ukrayina Baş prokurorı Ruslan Kravçenko Nariman Suleymanovnı Qırım Muhtar Cumhuriyeti ve Aqyar şeeriniñ Prokuratura reberi olaraq tayin etti. Bu buyruq 2026 senesi yanvarniñ 15-nde imzalandı.
Nariman Suleymanov Qırım prokuraturası reberiniñ muavini edi, amma soñki yarım yıl devamında Dnipropetrovsk vilâyetiniñ prokuror muavini olıp çalıştı. Suleymanov tayinini Jurnalist tedqiqatları merkezine izaat berip tasdıqladı.
Facebook saifesinde o, Dniproda beraber yapqan işleri içün teşekkürler bildirdi:
"Dnipropetrovsk vilâyetiniñ prokuratura hadimlerine aman-aman altı ay devamında beraber yapqan işimiz içün teşekkürler bildirem… Anda çalışqan insanlarnıñ ihtisaslılığından ayrette qaldım. Er kün ücümlerden zarar körgen regionğa küç ve çıdam tileyim!"
Müessise reberi vazifesi 2025 senesi sentâbrniñ 30-ndan berli boş edi, beş yıllıq müddeti yekünlengen İğor Ponoçevnıy işten boşatılğan edi. Keçici müddet devamında prokuratura yolbaşçısı vazifelerini birinci muavin Vitaliy Sekretar eda etti.
Malümat: Nariman Suleymanov 1988 senesi Özbekistanda sürgün etilgen qırımtatarlarnıñ qorantasında doğdı. Yaroslav Mudrıy Ukrayina milliy uquq akademiyasını bitirdi. Rusiye yarımadanı işğal etmezden evel Aqyar prokuraturasındaki mahkeme sistemasında çalıştı. 2014 senesinden soñ esas Ukrayinada prokuraturada çalışmağa devam etip, arbiy prokuratura, soñra Donetsk vilâyeti ve Qırım Muhtar Cumhuriyeti prokuraturalarınıñ reberliklerinde çalıştı.