Yanvar 15-inde Moskovanıñ Lefortovo rayon mahkemesi, Qırım yalısı yanında zapt etilgen daa dört ukrain arbiyiniñ tevfiq müddetini uzattı, dep bildire Qırım.Aqiqat mühbiri.
"Yañı Qapu"nıñ üyken matrosı Mihail Vlasük, "Berdânsk"niñ ekinci rang kapitanı Denis Gritsenko, "Nikopol"niñ üyken matrosı Vâçeslav Zinçenko ve Ukraina Havfsızlıq Hızmetiniñ qarşı istihbarat zabiti Andrey Draç aprel 24-üne qadar SİZOda bulunacaq.
Daa evel bildirile edi ki, Moskovanıñ Lefortovo rayon mahkemesi, Qırım yalısı yanında zapt etilgen sekiz ukrain arbiyiniñ tevfiq müddetini uzattı.
Evel bildirilgeni kibi, Moskovanıñ Lefortovo rayon mahkemesiniñ mahkemecileri Albina Galimova ve Sergey Râbtsev, zapt etilgen deñizcilerniñ sekiziniñ dava mahkemesini deñiştirmek imayeniñ muracaatını red etti. İmaye, Jeneva şartnamesine esaslanıp, deñizcilerniñ tevfiq müddeti uzatılmasınıñ baqıluvını arbiy mahkemede keçirmek muracaat ete edi.
Daa evel Qırım yalısı yanında FSB zapt etken 24 ukrain arbiyi, cenk esirleri olğanını tahqiqatqa beyan etti.
Your browser doesn’t support HTML5
Восьмерым захваченным украинским морякам продлили арест (видео)
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.