Dekabrniñ 23-nde gece ve saba Rusiye ücümi neticesinde eñ büyük zarar ğarbiy vilâyetler kördi, dep haber ete Ukrayina baş naziri Yuliya Sviridenko.
"Duşman 600-den ziyade dron ve onlarnen raketa qullandı. Milât bayramı arfesinde Rusiyeniñ añlı, tsinik darbesi edi. Adamlar bayramğa azırlanğanda duşman Ukrayina qorantalarını ışıqsız, sıcaqsız ve telükesizlik isisiz qaldırmağa tırıştı", – dep yazdı o, Telegramda.
Ukrayina energetika naziri vazifelerini eda etken Artem Nekrasovnıñ haber etkenine köre, yıl başından Ukrayina energetika sistemasına qarşı daa bir, doquzıncı Rusiye kütleviy ücümi neticesinde Rivne, Ternopil ve Hmelnıtskıy vilâyetleri aman-aman bütünley elektriksiz qaldılar.
"Vinnıtsâ, Çerniğiv, Jıtomır, Donetsk, Dnipropetrovsk ve Harkiv vilâyetlerinde de ateşlerden sebep söndirüvler bar. Qazaiy-tamir işleri telükesizlik vaziyeti buña imkân bergende başlanacaq", – dep haber etti memur.
Onıñ aytqanına köre, Odesa vilâyetinde regionnıñ energetik infrastrukturasına qarşı kütleviy darbelerniñ aqibetleri yoq etile, büyük sayıda qullanıcı ışıqsız qala.
Ukrayina energetika nazirligi hatırlatqanına köre, kütleviy raketa-dron ücümi sebebinden qazaiy söndürüvler cedveli işletile.
Rusiye ordusı gece Ukrayinağa uçucısızlarnen ücüm etti, saba Ukrayina Silâlı quvetleriniñ Ava quvetleri Rusiye raketalar da uçurdı, dep bildirdi. Bütün Ukrayinada ava telükesi ilân etildi. Ukrayina vilâyetlerinde dekabrniñ 23-nde saba elektrikler kesildi.
Kyiv akimiyeti Rusiye ücümi neticesinde yaralanğan üç kişi aqqında bildirdi, Kyiv vilâyetiniñ arbiy memuriyeti ise elâk olğan ve üç yaralanğan aqqında haber etti. Jıtomır vilâyetinde Rusiye darbesi neticesinde bala elâk oldı, Hmelnıtskıy vilâyetinde de bir kişi elâk oldı, dep haber etile.