Rusiye Tış işler nazirligi mayısnıñ 25-nde yapqan beyanatında Kyivni yañı darbelernen qorquzdı – mayısnıñ 24-ne keçer gecesi raketa ve uçucısızlarnen büyük ücümden soñ. O darbeler neticesinde 30-dan hiyade bina zarar kördi ya da yıqıldı, eki insan elâk oldı, yaralanğanlarnıñ sayısı 80-den çoq oldı.
Tış işler nazirligi beyanatında Ukrayina Silâlı quvetleriniñ mayısnıñ 22-ne keçer gecesi Starobelskke qarşı darbesi "sabırlarını taşıttı" ve bu vaziyette "Rusiye Federatsiyasınıñ Silâlı Quvetleri Kyivde Ukrayina arbiy-sanayı kompleksiniñ müessiselerine qarşı muntazam darbelerine başlay", dep aytıla. "Darbeler qararlar alınğan merkezlerge, komandanlıq noqtalarına endirilecek", – dep aytıla beyanatta. Qayd etilgenine köre, Moskva "çetel vatandaşlarını, şu cümleden diplomatik missiya ve halqara teşkilâtlarnıñ vekillerini" şeerni tez terk etmege, "Ukrayina paytahtınıñ sakinlerini ise arbiy ve memuriy infrastruktura obyektlerine yaqınlaşmamağa" çağıra. Ukrayina akimiyeti beyanatta "hunta" ve "Zelenskıynıñ rejimi" dep adlandırıla.
Rusiye kontrolindeki Lugansk vilâyetiniñ Starobelsk şeerine qarşı darbede, Rusiye akimiyetiniñ malümatına köre, 21 insan elâk oldı. Darbe neticesinde pedagogik köllec korpusı yıqıldı. Rusiye akimiyeti derc etken cedvelge köre, elâk olğanlarnıñ çoqusı 18 yaşından 22 yaşına qadar köllec talebeleri, çağına yetmegenler yoq. Rusiye resmiy vekilleri ve kütleviy haber vastaları darbe "balalarğa" endirildi, dep faal sürette yaza.
Ukrayina arbiyleri Starobelskte "Rubikon" Rusiye bölüginiñ komandanlıq noqtasına ücüm etildi, dep bildire, bunıñ mustaqil isbatı yoq.
Starobelskke qarşı darbeni Rusiye prezidenti Vladimir Putin izaatlap, Mudafaa nazirligi cevap darbelerinen bağlı tekliflerini taqdim etmeli, dep bildirdi. Mayısnıñ 24-ne keçer gecesi bir sıra vatandaş obyekti zarar körgen Kyivge qarşı darbe bir çoq AB memleketi takbih etti.