Rusiye Washington ve Kyiv añlaşqan telükesizlik kefaletlerini bilmey, dep bildirdi Rusiye Tış işler naziri Sergey Lavrov.
Onıñ aytqanına köre, Moskva "cemaat oyunlarına" degil, kerçek añlaşmalarğa baqacaq.
ABD Kongressi Senatınıñ tış işler komiteti diñlevlerinde devlet kâtibi Marco Rubio cenk bitken soñ Ukrayinanıñ telükesizlik kefaletleriniñ esas elementi ABDniñ destegi ola, dep bildirdi. Onıñ aytqanına köre, kefaletler mevzusında "bir añlaşma oldı", "az sayıda Avropa ordusınıñ bulunması, birinciden frenk ve ingliz, ve ABD destegi aytıldı.
Yanvarniñ 27-nde Financial Times sekiz menbasınıñ malümatına esaslanıp, ABD memuriyeti Kyivge telükesizlik kefaletleriniñ berilüvi Ukrayinanıñ Donbasnı Rusiyege bermege razılığını belgilegen barışıq añlaşmasınen bağlı ola bile, dep bildirdi. FT menbalarınıñ malümatına köre, Ukrayina ordusı Kyiv kontrolindeki rayonlardan çıqarılsa, Washington barışıq vaqtında Ukrayina Silâlı quvetleri içün silâ berilüvini arttırmağa azır. Neşir ABD formal bir mecburiyet alacaqmı añlaşılmay, dep qayd ete.
Yüksek rutbeli Ukrayina memurı ABD "telükesizlik kefaletleri imzalana bilgen er seferinde toqtay", dep bildirdi.
Beyaz Saray FT haberlerini inkâr etti. "Bu böyle degil. ABDniñ barışıq esnasındaki yekâne rolü eki tarafnı añlaşma içün yaqınlaştırmaqtır. Financial Timesniñ niyeti yaramay olğanlarğa gizli-gizli yalan aytmağa imkân bergeni yazıq", – dep ayttı Beyaz saraynıñ matbuat kâtibiniñ muavini Anna Kelli.
Ukrayina prezidenti Volodımır Zelenskıy yanvarniñ 23-nde Ukrayina içün telükesizlik kefaletleri vesiqası imza içün azır, dep bildirdi. Zelenskıy ABD prezidenti Donald Trumptan bu "tarihiy vesiqa" imzalanacaq kün ve yer aqqında malümat bekley, dep qayd etti.
Yanvarniñ 23-24-nde Abu-Dabide ABD, Ukrayina ve Rusiyeniñ Washington aracılığınen üç taraflı muzakereler keçti. Axios menbaları Donbasnen beraber bütün esas meseleler muzakere etildi, dep bildire.
Muzakerelerniñ nevbetteki basamağınıñ keçirilmesi bu afta Abu-Dabide fevralniñ 1-ne planlaştırıla.