"Rusiye Federatsiyasınıñ Memuriy cinayetler kodeksiniñ 20.3 maddesiniñ 1-inci qısmı boyunca Rustem Kâmilevge qarşı ilk protokol "Qırım birdemligi" saifesinden alınğan repost sebebinden tizildi. Bu, 2020 senesi derc etilgen ukrayin faali Oleg Prıhodkonıñ mahkemesi aqqında yazıdır. Prihodko, bayraq ve üç trızub resimi yapılğan kâğıtnı tuta. Merkeziy saylav komissiyasınıñ hadimleriniñ fikrine köre, resimdeki timsaller "Pravıy sektor" ukrayin teşkilâtına ait", — dep haber etile "Qırım birdemligi" saifesinde.
Ekinci protokol RF Silâlı quvetleriniñ "diskreditatsiyası" maddesine istinaden tizildi. Ekstremizmge qarşılıq kösterüv merkeziniñ hadimleriniñ malümatına köre, Kâmilev "Grigoriy Yavlinskiy" adlı qullanıcı tarafından Suriye ve Ukrayinadaki adise-vaqialar aqqında metin ve video ile paylaştı: "Bu, Rusiye içün on yıllar, belki de asırlar devamında unutılmaycaq ahlâqiy felâket". Soñra metinde, musulmanlarnı öldürmek, arbiy tehnikanı teşkermek — tam bir yamanlıq, dep aytıla. Derc daa 2017 senesi yapılğan edi, amma Rustem Kâmilevniñ Facebook saifesinde şimdilik yoq.
Daa evel belli olğanı kibi, "Qırım birdemligi" cemaat areketiniñ uquqçıları Rustem Kâmilev ve Lilâ Gemeciniñ evlerine polis hadimleri keldi.
Evde Rusiye kontrolindeki Aqmescit Kiyev rayon mahkemesiniñ qararı ile Qırımdaki Rusiyeniñ ekstremizmge qarşılıq kösterüv merkezi idaresiniñ hadimleri teşkerüv keçire.
Mayısnıñ başında haber etilgenine köre, Qırımdaki Rusiye quvetçileri uquqçılar Lilâ Gemeci ve Rustem Kâmilevge "mitingler aqqında qanunnı bozmaq mümkün olmağanı" aqqında tenbi vesiqasını berdi.
O vaqıt Sudaqtan "Qırım birdemliginiñ" cemaat imayecisi ve faali Seit-Osman Karaliyev de aynı tenbi ile qarşılandı. Rusiye İç işler nazirliginiñ aytqanına köre, o, "kütleviy aktsiyanıñ teşkilâtçısı" ola ve "ekstremist faaliyetini ve cemaat nizamını bozğanlarnı yoq etmek içün" tedbir almalı. Onı memuriy ve cinaiy maddelernen qorquzdılar.
Bundan da ğayrı, Aqmescit rayonında qırımtatar uquq qoruyıcısı ve adliyeci Nazim Şeyhmambetovğa "cinayet ve uquq bozuluvı içün şarait yaratacaq areketlerniñ ve cemiyetke qarşı areketlerniñ devam etmesine yol berilmemesi" aqqında tenbi vesiqası berildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.