İyulniñ 1-nde gece Qırımda atış ve patlav sesleri eşitildi. Rusiye akimiyeti Aqyarda ava telükesini ilân etti. Yerli saifeler de bu aqta bildirdi.
Aqyarnıñ Rusiye yolbaşçısı Mihail Razvojayev yarı gecege yaqın şeerde ava telükesi aqqında bildirdi, bu telüke tahminen üç saat devam etti. Aqyar akimiyeti ücüm ve darbeler aqqında bir tafsilât aydınlatmadı.
"Krımskiy veter" Telegram kanalı bildirgenine köre, Aqyarda gece saat ekilerden başlap "küçlü bir yanğın qoqusı bar edi, esasen Korabelnaya tarafında ve General Ostrâkov caddesi civarında".
Bunıñ gece ücüminen alâqası barmı belli degil, dep yazdı "Krımskiy veter".
Qırımnıñ diger rayonlarında keçken gece devamında ava telükesi ilân etilmegen edi.
Aynı vaqıtta yerli saifeler abunecilerniñ malümatına esaslanıp, Sarabuz qasabası, Kezlev, Saq rayonı, Kefe ve İslâm Terek rayonında atış ve patlavlar aqqında yazdı.
"Krımskiy veter" uydu çekimleriniñ malümatına esaslanıp, Saq rayonınıñ Yañı Qotur köyü yanında PS 330/110 kV "Zapadno-Krımskaya" elektrik aststantsiyasına qarşı darbe aqqında bildirdi. Bu malümatqa köre, "yanğınnıñ esas yeri VRU 110 kVde buluna".
PS 330/110 kV "Zapadno-Krımskaya" elektrik aststantsiyası Qırımnıñ elektrik energiyası tarqatılğan ve berilgen sistemanıñ esas hatı ola – eleyektrik stantsiyalarından qullanıcılarına qadar. O, yarımadanıñ merkeziy ve ğarbiy qısımlarına hızmet ete, anda Rusiye arbiy obyektleriniñ sayısı pek büyük, dep yaza "Krımskiy veter". Onıñ malümatına köre, bundan evel aststantsiyağa iyünniñ 22-nde ücüm etildi.
Yerli saifelerniñ haberine köre, gece ücümlerinden soñ abuneciler Kefede ışıq olmağanını bildire.
"Tavrida" yolunda demiryol üstündeki yolda yanğın qayd etile, dep bildirdi "Krımskiy veter" monitoring gruppası uydu çekimleriniñ malümatına esaslanıp. "Yanğın demiryol Kefege ketken Vladislavovkadan cenüpte qayd etile", – dep bildirdi saife.
Ukrayina ve Rusiye arbiyleri gece ücümini şimdilik izaatlamadılar.
Bu malümatnı Rusiyeniñ Ukrayinağa qarşı büyük ücümi vaqtında tasdıqlamaq imkânsız ola, lâkin muarririyet bu haberlerniñ doğrulığını teşkermek içün çare qıdıra.
İyün ayında arbiyler ve energetika obyektleri, Qırımdaki Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.