Ukrayinada Qırım Muhtar Cumhuriyetiniñ VI çağıruv Yuqarı Radasınıñ sabıq deputatı devlet hainliginde qabaatlanıp, 14 yılğa azatlıqtan marum etildi, dep haber ete Qırım Muhtar Cumhuriyeti Prokuraturasınıñ matbuat hızmeti.
Berilgen malümatqa köre, mahküm etilgen adam diger deputatlarnen beraber "Qırımnıñ Rusiye Silâlı quvetleri tarafından işğali ve istilâcı devletniñ areketlerini qanuniyleştirmek içün bir sıra qanunsız qararlarnıñ qabul etilmesi içün" rey berdi.
"Söz Qırım sakinleriniñ "serbest iradesi"ni köstermek kerek olğan "Umumqırım referendumı"nı keçirmek qararı, "Qırımnıñ Rusiye terkibine qoşulmasını közde tutqan "Qırım Muhtar Cumhuriyetiniñ mustaqilligi" aqqında beyannamesiniñ qabul etilüvi aqqındadır. Ukrayina Yuqarı Radasınıñ Qırım deputatlarınıñ vekâletlerini toqtatqan qararına baqmadan, mahküm etilgen adam "Qırım mustaqilligi", "Qırım Cumhuriyetiniñ mirasçılığı" ve "Qırım Cumhuriyetiniñ Anayasası" qararlarınıñ qabul etilmesi içün de rey berdi", — dep aytıla haberde.
Qırım Muhtar Cumhuriyetiniñ prokuraturasında qoştılar ki, bundan soñ erkek qanunsız teşkil etilgen saylavlarnıñ iştirakçisi oldı, neticede "Yedinaya Rossiya" siyasiy firqasından "Qırım Cumhuriyetiniñ I çağıruv Devlet Şurasına" saylandı.
Müessiseniñ beyanatında mahküm etilgenniñ adı ve soyadı aytılmay, lâkin medianen laf etmege aqqı olmağan ve adı bildirilmek istemegen menba Qırım.Aqiqatqa aytqanı kibi, söz Remzi İlyasov aqqında kete. O, bu üküm boyunca açıq izaat bermedi.