Zelenokumsk koloniyasında Cezalarnı yerine ketirüv federal hızmetiniñ hadimleri yanında mabüsler Qırımlı jurnalist ve aq qorçalayıcı İrına Danılovıçnı öldürmeknen qorquza. Bu aqta "Pisma v nevolü" teşebbüsinden "Arhipelag UFSİN" leyhasınıñ haberinde aytıla, menbalar aydınlatılmay. Qırımlınıñ qardaşı Olga Novitskaya Qırım.Aqiqatqa koloniya memuriyeti taktikasını deñiştirdi ve Danılovıçqa qarşı mabüslerniñ areketlerine qoltutqanını bildirdi.
"Anda narkotik içün mahküm etilgenler – Ş. ve J. (muarririyet adlarını bile) bar. Olar cezasızlıqnı ve koloniya memuriyetiniñ sessiz destegini is ete. İrınağa qarşı aytqanlarında olar onı öldürseler bile bir ceza almazlar, dep qayd ete. Onı qaidelernen yasaqlanğan radiodan sesli muzıkanen bezdireler, amma inspektorlar bunı körmey", – dep qayd etti vaziyetni Olga Novitskaya.
"Arhipelag UFSİN" leyhasınıñ haberinde de aynı malümat berile, ve, aq qorçalayıcılarnıñ malümatına köre, Danılovıçqa qarşı sert areketlerge alâqası olğan Cezalarnı yerine ketirüv federal hızmeti hadiminiñ adı belli.
"1992 senesi doğma Zelenokumsk sakini S. Galina (muarririyet adını bile) koloniyada inspektor olıp çalışa. Koloniya tışında qadınnıñ bahtlı yaşayışı bar – kiçik oğlunı birinci sınıfqa, büyügini orta mektepke azırlay, aynı evde yaşağan ana-babasını ve qartana ve qartbabasını ziyaret ete, aqayını STOdan işten qarşılay… Mabüslerge qarşı onı ne canavarğa çevire – belli degil", – dep qayd ete müellifler.
Aq qorçalayıcılar seslendirgen malümat qoşma menbalarda tasdıqlanmalı.
Hatırlatamız, 2026 senesi oktâbr ayında Qırım aq qorçalayıcı gruppasınıñ idare reisi Olğa skrıpnik Rusiye koloniyasında İrına Danılovıçqa qarşı işkencelerge başqa bir mabüs de celp etildi.
Üç ay evelsi Sıñırsız reportörlar (RSF) halqara teşkilâtı Amerika İnsan aqları fondunen (HRF) beraber qırımlı jurnalist İrına Danılovıçnıñ davasını BM altı mahsus maruzacısına berip, sağlıq vaziyeti daa yaramay olğanı içün acele areketke keçmege çağırdı, amma bugünge qadar bir cevap olmadı. "Qırım esnası" aq qorçalayıcı teşkilâtı BM söz serbestligi mahsus maruzacısına azatlıqtan marum etilgen jurnalistlerge qarşı repressiyalar mevzusını yaqın üç yılğa strategik meseleler cedveline kirsetmege tevsiye etti.