İtaliyanıñ baş naziri Cüzeppe Könte (Giuseppe Conte), Ukrainağa tecavuzı neticesinde 2014 senesi Rusiyege qarşı kirsetilgen iqtisadiy sanktsiyalar devam etecegini bildirdi.
Könte, AQŞ prezidenti Donald Tramp (Donald Trump) ile beraberlikte keçirilgen matbuat konferentsiyasında, sanktsiyalarnıñ toqtatılması “imkânsız” dep ayttı.
Könte ve italyan koalitsiyasınıñ başqa bazı azaları sanktsiyalarnıñ toqtatılması ve Rusiyenen munasebetlerniñ eyileşmesini istegen edi, amma İtaliya yolbaşçısı Avropa Birligi (AB) tarafından sanktsiyalarnıñ uzatılmasına qoltuttı.
Rusiye prezidenti Vladimir Putin ile körüşüvden soñ tenqit etilgen Tramp, AQŞ-nıñ AB-nen aynı vaqıtta başlanılğan sanktsiyalarnıñ da devam etecegini qayd etti.
Ğarp ve Moskova munasebetleri, Rusiyeniñ Qırımnı işğal etkeninden ve Donbassta silâlı çatışma başlanmasından soñ kerginleşti. Bundan soñ AB ve AQŞ Rusiyege qarşı defalarca arttırılğan ve quvetleştirilgen iqtisadiy sanktsiyalarnı kirsetti.