Ukrayına Yuqarı Radası «Ğolos» firqasından halq deputatı Rustem Umerovnı Ukrayına Devlet Mülki Fondunıñ yolbaşçısı vazifesine tayin etti. Bu aqta «Ğolos» fraktsiyasınıñ yolbaşçısı Yaroslav Jeleznâk sentâbrniñ 7-nde bildirdi.
«Parlament «Ğolostan» zenaatdaşımız Devlet Mülki fondunıñ reisi olaraq Rustem Umerovnı tayin etti. 282-si qoltuttı. Qarşı çıqqanlar – 0», – dep yazdı o, Telegram kanalında.
Parlament azasınıñ malümatına köre, ekseriyetke saip olğan «Sluğa narodu» fraktsiyasından Umerovnıñ namzeti 198 rey aldı.
«Sluğa narodu» fraktsiyasınıñ toplaşuvında Rustem Umerov bu vazifeniñ namzeti olaraq taqdim etildi.
Ukrayına Yuqarı Radası Ukrayına Devlet Mülki Fondunıñ yolbaşçısı Dmıtro Senniçenkonı 2022 senesi fevralniñ 17-nde işten boşattı.
Rustem Umerov – halq deputatı, «Ğolos» («Ses») fraktsiyasınıñ azası ve insan aqları, işğalden azat etüv ve vaqtınca işğal etilgen topraqlarnıñ reintegratsiyası parlament komitetiniñ kâtibidir. O, «Qırım platforması» fraktsiyalarara birleşmesiniñ reisdeşi ola.
Rusiye Ukrayınağa büyük istilâ kerçekleştirgen soñ Umerov Rusiye Federatsiyasınıñ vekilleri ile muzakere eyyetiniñ erkânına kirdi. Bundan ğayrı, iyülniñ 19-nda Rustem Umerov Ukrayınağa kösterilgen arbiy yardımnı qullanuv kontroliy muvaqqat tahqiqat komissiyasınıñ yolbaşçısı oldı. Siyasetnen oğraşmağanda Rustem Umerov iş adamı, yatırımcı, metsenat ve qırımtatar halqınıñ lideri Mustafa Cemilevniñ mesleatçısı edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.