Litvaniya, Latviya ve Estoniya rusiyelilerniñ öz sıñırlarından Avropa Birligine kirişini sıñırlamağa añlaştı. Bu Avropa Birliginiñ devletleri şengen vizası olğan rusiyeliler içün qara sıñırlarnı keçüvde «ciddiy sıñırlavlar» aqqında qararnı qabul etti. Bu aqta Latviya Tış işler nazirliginiñ yolbaşçısı Edgars Rinkeviç bildirdi.
Yük maşinalarınıñ aydavcıları, qoranta ve gumanitar sebeplerden kirgen diplomat ve vatandaşlar içün istisnalar yapılacaq.
Yasaq aqqında resmiy şekilde yaqın vaqıtta ilân etilecek.
«Qararlar milliy tedbirlerge köre milliy ükümet tarafından qabul etilecek ve aynı vaqıtta işke tüşürilecek», – dedi Rinkeviç.
Baltık memleketleriniñ vekilleri olar içün bu milliy telükesizlik meselesi ola, dep qayd etti. Misal olaraq, fevralniñ 24-nden başlap 300 biñ rusiyeli Estoniyağa ketti, memleketniñ ealisi ise 1,3 million ola.
Aynı vaqıtta Litvaniya, Latviya ve Estoniyanıñ teşebbüsine daa evel qoltutqan Finlândiyanıñ akimiyeti Rusiye turistleriniñ kirişini Avropa komissiyasınıñ qararı olmasa, sıñırlamaycaq, dep qayd etti.
Avropa komissiyası sentâbrniñ 12-nden başlap Rusiye ile viza rejimini qolaylaştıruv añlaşmasından bütünley vazgeçüv qararını tasdıqladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.