Ukrayinağa Rusiye istilâsına qarşılıq kösterüvde qol tutuv, Şimaliy Atlantik birliginiñ 32 memleket-azası temsilcileriniñ muzakere etken esas meselelerinden biridir. Deklaratsiyada Ukrayinanıñ NATO-ğa kirmek içün şart olğan iqtisadiy, demokratik islâatlar saasında qazanğan ilerilemesi qayd etile. "Ukrayina bu müim işni devam etkeni kibi, biz onıñ NATO azası olmaqnen beraber, tam bir avroatlantik integratsiyasına doğru keri qaytarılmaz yoluna qoltutmağa devam etecekmiz", - dep aytıla beyannamede. Bunen beraber, Vilnüsteki keçken NATO sammitinde olğanı kibi, aza memleketleri Ukrayinanıñ NATO-ğa kirüv ceryanınıñ başlanması içün muayyen bir müddet belgilemediler. Beyannamege binaen, Kıyivge NATO-ğa kirmek içün davetname "işbirlik tarafları arasında añlaşma olsa ve Ukrayina şartlarnı yerine ketirse" berilecek.
İştirakçi memleketler Rusiye istilâsına qarşı küreşte Ukrayinağa yardım etmege niyetini tasdıqladılar.
NATO beyannamesinde, ilk sefer, Çin, Ukrayinanen cenkte Rusiyege qoltutqanında "qararlı" rolü içün tenqit etildi ve "silâ komponentleri" ve Rusiye arbiy-sanayı kompleksiniñ çalışması içün müim olğan tehnologiyalarnıñ berilmesini toqtatmağa talap etildi. Çin, onıñ menfaatları ve itibarı içün menfiy aqibetleri olmadan, Avropanıñ soñki tarihında eñ büyük cenkke qoltutamaz, dep tenbiyeley NATO Çinni.
Sammitte ABD prezidenti Joe Bayden çıqışta bulundı. Ukrayinağa yardım köstermek niyeti onıñ çıqışınıñ esas tezi edi.
NATO baş kâtibi Yens Stoltenberg, NATO Ukrayinağa qol tutacağını daa bir kere tasdıqladı. "Ukrayinağa qoltutuv - hayriye degil. O, bizim öz telükesizligimiz içün yapıla", — dedi Stoltenberg.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.