Rusiyeniñ Ukrayinadaki cenkini toqtatmaq içün añlaşma tizmege qıyın olacaq, dep bildirdi kiçik aynıñ 3-nde Verhovna Radada çıqışta bulunğan vaqıtta NATO baş kâtibi Mark Rütte. Bunı Reuters haber ete.
Siyasetçi ne demek istegenini añlatmadı, amma keçken afta Financial Times neşri, ABD memuriyeti Kıyivge telükesizlik kefaletleriniñ berilmesi Ukrayinanıñ Donbastan Rusiye faydasına vazgeçken barışıq añlaşmasına razılığı ile bağlı ola bilecegini añlattı, dep yazdı. Beyaz evniñ matbuat kâtibiniñ muavini Anna Kelli şunı qayd etti ki, "ABD-niñ barışıq esnasındaki yekâne rolü, eki tarafnı añlaşmağa yaqınlaştırmaqta".
Kıyivge ziyareti vaqtında Ukrayina parlamentine muracaatında Rütte, PURL silâ satın aluv programması boyunca Ukrayina, ava mudafaası sistemaları içün raketalarnıñ yüzde 90-ı ala, dep ayttı.
PURL programması, NATO-nıñ Avropa memleketleriniñ parasınen ABD-den silâ (hususan, Patriot raketaları) satın aluvını közde tuta. Evel Ukrayina ittifaqdaşlarınıñ bir qısmı PURL programmasında iştirak etüvni sıñırlağanını bildirgen edi, çünki olar öz silâsını teminley, Amerika silâsını degil. 2026 senesine qadar Ukrayina ava mudafaası sistemaları içün raketalarnıñ büyük bir qısmı ABD-den arbiy yardım olaraq kele edi.