Qırımdaki Rusiye mahkemesi tarafından 17 yılğa üküm etilgen qırımtatar faali ve siyasetçi Nariman Celâl işğal etilgen Qırımda Rusiye Federatsiyasınıñ mahkeme sistemasını yalanda qabaatladı. Bu aqta advokat Nikolay Polozov dekabrniñ 16-nda derc etken mektübinde ayttı.
«Yalan, yalan, yalan. Er yerde. Balabandan kiçigine qadar. Bir ihtiyac ola bilecek ve iç olmağan yerde. 18.02.22 olıp keçken ilk mahkeme oturışuvınıñ protokolını baqam, oqudım, Rusiye Federatsiyasınıñ Cinaiy-protsessual kodeksiniñ 54-ünci maddesine köre oqulğan aq ve mecburiyetlerimden soñ qadı Zinkovnıñ er şey añlaşıldımı sualine böyle cevap bergen ekenim: «Ebet, ürmetli qadı, bir şey añlatmağa acet yoq. Elliden çoq çeşit mahkeme oturışuvlarından birinde bile bir kere olsun «ürmetli qadı» ibaresini qullanmadım. Añlı ve emin bir şekilde. Ne qadı Zinkov, ne zenaatdaşlarınıñ şerefi yoq. Qırımlı qadılar Rusiye repressiv akimiyet sistemasınıñ qoşumtısı olmağa razı olıp, mustaqil mahkeme sistemasını temsil etmey», – dep aytıla Celâlnıñ mektüp metninde.
Your browser doesn’t support HTML5
«Наримана забрали, чтобы обескровить Крым» – фильм «Голос Крыма. Нариман Джелял» на саммите «Крымской платформы»
O, Rusiye cemiyetini «yalan hastalığı sardı», dep ayttı.
«Onı başından aşağace sarıp aldı. Dayanıp, bu hastalıqqa boysunmamaq – büyük ahlâqiy ğayret istey. Ve er bir normal insan maneviy sağlığı, tuvğanları içün küreşmege mecbur. Ve bu küreş işğalniñ doquz yılından berli devam ete. Zarar menbası yoq etilgende bile bütün normal insanlar sağlam bir müitte uzun reabilitatsiyağa muhtac olacaq. Amma bazılarınıñ hastalığı keçmeycek», – dep qoştı Celâl.
Rusiye kontrolindeki Qırım Yuqarı mahkemesi sentâbrniñ 21-nde Anğarada «gaz borusındaki diversiya davasınıñ» mabüslerini uzun apis müddetlerine üküm etti: Nariman Celâl 17 yılğa ve 700 biñ ruble para cezasına, Asan Ahtemov 15 yılğa ve 500 biñ ruble para cezasına, Aziz Ahtemov 13 yılğa ve 500 biñ para cezasına üküm etildi.
Ukrayına Tış işler nazirligi, Ukrayınanıñ Qırım Muhtar Cumhuriyetindeki temsilciligi, Qırımtatar Milliy Meclisi ve aq qorçalayıcılar Celâl ve ağa-qardaş Ahtemovlarğa çıqarılğan ükümni takbih ettiler.
Qırımtatar halqınıñ lideri Mustafa Cemilevniñ Qırım.Aqiqatqa bildirgenine köre, o, Celâlnı Rusiye apsinden azat etüv meselesini Türkiye prezidenti Recep Tayyip Erdoğannen muzakere etmege niyetlene.
Avgustnıñ 23-nde «Qırım platforması» ekinci halqara sammitiniñ iştirakçileri Rusiyeni Nariman Celâlnı ve bütün qırımlı siyasiy mabüslerni azat etmesine çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.