Qırımtatar Milliy Meclisiniñ reis muavini Nariman Celâl Rusiye apsinden Ukrayınağa qaytarıldı. Bu aqta Ukrayına prezidenti Volodımır Zelenskıy iyünniñ 28-nde aqşam Telegram kanalında bildirdi.
«Daa on insanımıznı Rusiye esirliginden qaytarıp oldıq. Qıyınlıqlarğa baqmadan. Nariman Celâl, Qırımtatar Milliy Meclisiniñ reis muavini, daa 2021 senesi Qırımda zapt etildi. Yelena Peh ve Valeriy Matüşenko – 2017-2018 senelerinden berli esirlikte olğan vatandaşlar. Bogdan Geleta ve İvan Levitskiy – Berdânskte işğalcilerge tirengen Ukrayına yunan-katolik kilsesiniñ papazları», – dep yazdı Zelenskıy.
Zelenskıynıñ malümatına köre, Beyazrusiyede zapt etilip azatlıqtan marum etilgen daa beş vatandaş Ukrayınağa qaytarıldı: Nikolay Şvets, Natalya Zaharenko, Pavel Kupriyenko, Lüdmila Gonçarenko ve Yekaterina Brühanova. Episi azat etildi ve evde buluna – Ukrayınada.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Oktâbrniñ 2-nde Nariman Celâl ve ağa-qardaş Ahtemovlar Aqmescitteki SİZO-2-den alındı ve Rusiye apishanelerine etap etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.