Mısırnıñ sabıq prezidenti ve «Musulman qardaşlar» teşkilâtınıñ sabıq lideri Muhammed Mursi casuslıq ile alâqasına dair davası baqılğan mahkemede vefat etti. Bu aqta BBC Mısır televideniyesine esaslanıp haber ete, dep yaza Azatlıq Radiosı.
2015 senesi aprel ayında Mursi prezidentlik vaqtında narazılıq bildirgenlerni apiske almağa ve işkencege oğratmağa emir etkeni içün 20 yılğa üküm etilgen edi. Onı HAMAS Filistin radikal taqımı ve «Hezbolla» Lübnan radikalları ile bağı olğanında qabaatlağan ediler.
Muhammed Mursi 2012 senesi «arap baari» ve prezident Hosni Mubarak devrilgen soñ Mısır tarihında ilk olğan demokratik raqiplik saylavlarında ğalip çıqqan edi. 2013 senesi iyül ayında Mursi Mısır silâlı quvetleriniñ generalları tarafından akimiyetten çetleştirildi. «Musulman qardaşlarnı» terror teşkilâtı olaraq ilân etken Abdul-Fattah as-Sisi devlet yolbaşçısı oldı.