Bağçasaraydaki "beşinci qırımlı musulmanlar gruppası" mabüsleriniñ imayesi Rusiye Cenübiy okrugınıñ arbiy mahkemesine mustaqil ekspertizanı taqdim etti. Anda Rusiye Federatsiyası Federal telükesizlik hızmeti (FSB) içün ses qaydlarınıñ tedqiqatını tizgen mütehassıslar "uydurğan hulâsalarnı" taptı. Bu aqta advokat Emil Kurbedinov "Qırım birdemligi" cemaat birleşmesine haber etti.
Mahkeme oturışuvda imaye bergen bir qaç vesiqanı davağa qoştı: mustaqil mütehassıslarnıñ eki hulâsasını ve psihologik-tilşınas ve dinşınas ekspertizalarına retsenziyanı. Daa evel bu tedqiqatlarnı mahkemede qabaatlav tarafı bergen edi.
Kurbedinov şunı qayd etti: mustaqil ekspertler FSB teşebbüsinen yapılğan ekspertizalarnıñ bozuvları bar, dep hulâsa çıqardı. Hususan, psihologik-tilşınas ve dinşınas tedqiqatları tek devlet ekspert müessiselerinde yapıla bile.
"Amma FSB muracaat etken ekspertler öyle degil edi… Bu da bozuv delillerimizni tasdıqlay, şu cümleden gumanitar ekspertiza, tilşınas, psihologik, dinşınas ekspertizalarnıñ. Bir çoq hulâsa uydurıldı. Böyle ekspertizalarda qullanılmağan usullar umumiy ibareler altında qayd etildi", – dep bildirdi advokat.
Davanıñ nevbetteki oturışuvı aprelniñ 20-ne belgilendi. İmaye delillerini köstermege devam etecek.
«Qırım platforması» sammitiniñ ertesi künü, 2023 senesi avgustnıñ 24-nde, Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi.
Aynı şu künü Rusiye kontrolindeki Aqmescitniñ Kiyev rayon mahkemesi üçüni apiske aldı – Ruslan Asanov, Amethan Umerov ve Remzi Nimetulayev eki ayğa SİZOğa yollanıldı. Tutulğanlar Rusiye Federatsiyası Ceza kodeksiniñ 205.5-nci maddesiniñ birinci qısmı – terrorcı teşkilâtnıñ faaliyetini teşkil etmek ve böyle teşkilâtnıñ faaliyetinde iştirak etmek – şübhesinen qabaatlandı. Laf Rusiyede yasaqlanğan «Hizb ut-Tahrir» teşkilâtı aqqında kete.
2024 senesi iyün ayında Aqmescitte Rusiye kontrolindeki Kiyev rayon mahkemesi altı qırımtatar faalini apishanede qaldırdı. Seydamet Mustafayev, Eldar Yaqubov, Abdulmecit Seitümerov, Ruslan Asanov, Amethan Umerov ve Remzi Nimetulayev 2024 senesi noyabrniñ 24-ne qadar SİZOda qalacaqlar.
Bu yıl fevral ayında Rostov-na-Donu Cenübiy okrugınıñ arbiy mahkemesi Bağçasaraydaki beşinci "qırımlı musulmanlar davası" mabüsleriniñ apis müddetini mayısnıñ 23-ne qadar uzattı.