Moskvanıñ Basmannıy rayon mahkemesi halqara qıdıruvğa ilân etilgen jurnalist, ATR telekanalınıñ baş müdir muavini Ayder Mujdabayevni «terrorizm çağıruvlarında» qabaatlap, ğıyabiy şekilde apiske aldı. Bu aqta Rusiye devlet kütleviy haber vastaları mahkemeniñ matbuat hızmeti bildirgenine esaslanıp haber ete.
«Basmannıy rayon mahkemesiniñ qararınen Mujdabayevge qarşı eki ay apiste tutuv şeklinde sıñırlav tedbiri belgilendi, o, ekstraditsiyasından soñ ya da Rusiyede tutulğanda başlanacaq», – dep ayttı mahkemeniñ matbuat kâtibi İrina Morozova.
Rusiye Tahqiqat komiteti cumaaqşamı künü, iyünniñ 25-nde, bildirdi ki, ATR telekanalınıñ baş müdir muavini, jurnalist Ayder Mujdabayev ğıyabiy şekilde «terrorizmde» qabaatlandı ve halqara qıdıruvğa ilân etildi.
Ayder Mujdabayev Tahqiqat komitetiniñ haberini izaatlap, onı «Qırımtatar bayraq kününe eñ yahşı bahşış» dep adlandırdı.
Ukraina Tış işler naziri Dmıtro Kuleba Rusiyede ATR telekanalınıñ baş müdir muavini, jurnalist Ayder Mujdabayevge qarşı açılğan davanı «siyasiy taqip» dep adlandırdı.
Mayısnıñ 22-nde ATR qırımtatar telekanalınıñ baş müdir muavini Ayder Mujdabayevniñ Twitterde bildirgenine köre, Rusiyede oña qarşı «terror faaliyetine açıq çağıruv, terrorizmni açıq aqlav ya da terrorizm propagandası» maddesine istinaden cinaiy dava açıldı.
Mujdabayevniñ aytqanına köre, cinaiy dava Facebookta «Sentsovnı qurtarmaq» kerek olğanına dair yazğanları sebebinden açıldı. Jurnalistniñ qayd etkenine köre, qararda «onıñ Rusiye casuslarını tutıp, avtomat qoymağa ve Putinden Sentsovnı olarğa deñiştirmesini talap etmege çağırğanı» aytıla.