Birleşken Milletler kâtibi Antonio Guterresniñ Rusiye prezidenti Vladimir Putin ile Ukrainadaki vaziyetnen bağlı körüşüvi yekünlendi.
Vladimir Putin körüşüvde Rusiye Ukraina ile añlaşmağa ve vaziyetni diplomatik yollarnen tertipleştirmege niyetlene dep, eyyetlerniñ İstanbul muzakereleri muvafaqiyetli oldı, dep qayd etti.
«Bayağı ciddiy bir ilerilev oldı. Ukrainalı zenaatdaşlarımız telükesizlik talaplarını Ukrainanıñ halqara seviyede tanılğan sıñırlarınen bağlamadı», – dedi Putin.
Rusiye prezidentiniñ aytqanına köre, muzakerelerden soñ Moskva «provokatsiyalarğa» oğradı – Putin bir qaç yüz insan öldürilgen Buça şeerindeki adiselerni böyle tarif etti.
BM Baş kâtibi Antonio Guterres Türkiyeniñ muzakere keçirüv ğayretlerine qoltutqanını bildirip, gumanitar ayatlarnen bağlı BM-RF-Ukraina bağ gruppasını qurmağa teklif etti.
Hususan – Ukraina arbiyleri imaye etmege devam etken Mariupoldeki «Azovstal» zavodından insan tahliyesi meselesini al etmege teklif etti. Rusiye prezidenti Mariupolde cenk areketleri yoq, dep cevap berdi, Rusiyeniñ yardımınen andan 140 biñ insan çıqqan eken.
Guterres Ukrainada olıp keçkenlerni suveren toprağına ücüm dep adlandırdı, Putin Rusiye arbiyleriniñ areketlerini «mecburiy adım» dep, Donbas sakinleri Ukraina akimiyeti sebebinden sekiz yıl qamaçavda qaldı, dep qoştı.
Rusiye prezidenti onıñ memleketi BMge, halqara munasebet iştirakçileri küçü, büyükligi ve coğrafik yerine baqmadan, bir-birinen teñ dep aytqan onıñ nizamnamesine daima qoltuttı ve qoltutacaq, dep qayd etti.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3f6698iwwkivl.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.