Ukrayina prezidenti Volodımır Zelenskıynıñ bildirgenine köre, Rusiye lideri Vladimir Putinnen cenkni bitirüv körüşüvi «tarafsız Avropada» keçirilmeli. Bu aqta Zelenskıy jurnalistlernen subetleşip ayttı, onıñ aytqanlarını avgustnıñ 21-nde kütleviy haber vastaları bildire.
«Adaletli olması şu ki… körüşüvniñ tarafsız Avropada keçirilmesi olur edi. Çünki cenk Ukrayinada ve Avropa qıtasında», – dedi prezident ve Ukrayina tarafı muzakere yeri olaraq İsviçre, Avstriyanı qabul etmege azır, Türkiyege de qarşı çıqmay, çünki bu NATO memleketi ve Avropanıñ bir qısmı.
Zelenskıy körüşüv meydançığı olaraq Budapeştni aytıp, Ukrayinağa qoltutuvğa qarşı çıqqan Macaristan akimiyeti sebebinden «bu zor», dep ayttı.
«Körüşüv Moskvada olamaz», – dep qayd etti Ukrayina prezidenti.
Zelenskıy Rusiye tarafı liderler körüşüvinden vazgeçse, ABD cevap berir, dep ümüt ete. «Ruslar» azır olmasa, Amerika Birleşken Devletleriniñ küçlü cevabını körmek ister edik», – dedi o.
Aynı vaqıtta, Telegram kanalında avgustnıñ 21-ne keçer gecesi Rusiyeniñ Ukrayinağa qarşı kütleviy ücümini izaatlap, Zelenskıy Rusiyeniñ bu areketleri olar içün «bir şey deñişmegenini» köstere. «Bu cenkni toqtatmaq çiyun bir barışıq ğayreti yoq. Buña cevap bermek kerek. Moskvadan mündericeli muzakerelerge ketmeg azırlanğanlarına ve bu cenkni toqtatmağa azır olğanlarına dair bir areket yoq. Basqı kerek. küçlü sanktsiyalar, küçlü tarifler», – dep qayd etti o.
Avgustnıñ 18-nde ABD prezidenti Donald Trump Zelenskıy ve Avropa liderlernen muzakere keçirgen soñ Ukrayina ve Rusiye arasında liderler seviyesinde körüşüv azırlay dep ilân etti ve soñra onıñ iştirakinen üç taraflı sammit ola bile, dep tahmin etti.
Beyaz saray Putin Zelenskıy ile eki taraflı körüşüvge razı oldı, dep bildirdi, bu körüşüvden soñ ABD prezidentiniñ iştirakinen üç taraflı muzakereler ola bile.
Beyaz saray temsilcisi Karoline Leavitt qayd etkenine köre, ABD tarafından körüşüvni azırlamaq içün ABD prezident muavini James David Vance, devlet kâtibi Marco Rubio ve prezidentniñ mahsus vekili Steven Witkoff çalışalar.
Kreml Zelenskıy ve Putin arasında körüşüv planlarını tasdıqlamayıp, Moskva Ukrayina ve Rusiye muzakerelerinde «vekillerniñ derecesini arttıruv imkânını baqa bile», dep bildirdi. Rusiye Tış işler naziri Sergey Lavrov ise Rusiye Ukrayinağa qarşı cenkni toqtatmaq içün barışıq muzakereleriniñ er angi formatından vazgeçmey, dep bildirdi: ne eki taraflı, ne de üç taraflıdan.
Lavrov devletniñ ilk şahısları iştirakinen bağlar azırlanmalı, dep bildirdi. «Liderlerniñ iştirakinen er bir bağ büyük ğayretlernen azırlanmalı», – dedi o.
Ukrayina prezidenti qayd etkenine köre, o, Putinnen eki taraflı körüşüvge azır, bu körüşüv üç taraflı da ola bile – ABD prezidenti Donald Trumpnıñ iştirakinen. «Bu seviyede er angi formatqa azırmız, çünki tek liderler seviyesinde bütün zor, ağrılı meselelerni çeze bilemiz… Şunıñ içün men tasdıqladım, ve bütün Avropa liderleri qoltuttı, Putinnen eki taraflı körüşüvge azırmız, ve bundan soñ üç taraflı körüşüvni bekleymiz», – dedi Zelenskıy.
Körüşüv künü ve yeri daa belli degil. Yer olaraq Budapeşt, İsviçre (Jeneva), Türkiye (İstanbul) aytıla, Trump Alâskanı da teklif etken edi. Aleksandr Lukaşenkonıñ ofisi Minskni teklif etti.