Oktâbrniñ 7-nde Moskva vilâyetiniñ üzerinde pilotsız uçaq urıp tüşürildi, dep bildirdi Rusiye Mudafaa nazirligi ve Moskva şeer başı Sergey Sobânin.
"İstrin şeer bölgesinde Moskvağa ketken pilotsız uçaq urıp tüşürildi", - dep yazdı Sobânin. Moskva ava limanlarında kene onlarnen uçuşlar keçke qaldı ya da lâğu etildi.
Rusiye Mudafaa nazirligi dron Ukrayinadan uçurtılğanını iddia ete. İlk malümatqa köre, dron tüşken yerde dağıntular ve zarar körgenler yoq.
Bundan ğayrı Rusiye Mudafaa nazrligi işğal etilgen Qırım yalısında dron urıp tüşürilgeni aqqında bildirgen edi.
Rusiyeniñ Ukrayinağa büyük cenkiniñ ekinci yılında Rusiyeniñ em sıñırda olğan em de Ukrayina topraqlarından bayağı uzaq olğan bölgeleri muntazam şekilde ateşke tutula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.