Mayısnıñ 5-nde kündüz Moskvanıñ bütün ava limanları uçuşlarını toqtattı. Şeremetyevo ava limanınıñ matbuat hızmeti vaqtınca sıñırlavlar aqqında bildirgen soñ RBK buña diqqat ayırdı. Vnukovo, Domodedovo ve Jukovskiy ava limanlarınıñ işinde sıñırlavlar aqqında haber etilgen edi. "Kilim" planı kirsetildi – ava limanları uçuşlarnı qabul etmey ve yollamay.
Böyle tedbirler uçucısız ücümi telükesi sebebinden kirsetile. Ukrayina arbiyleri mayısnıñ 5-ne keçer gecesi Rusiye regionlarına, şu cümleden Çuvaşiya ve Leningrad vilâyetine ücüm etti. Moskvanıñ şeer yolbaşçısı Sergey Sobânin kün devamında bildirdi ki, Moskvağa uçqan tahminen 10 uçucısız urıp tüşürildi.
Mayısnıñ 4-ne keçer gecesi uzun vaqıt devamında ilk sefer uçucısız Moskvağa uçıp keldi ve şeerniñ ğarbindde çoq qatlı evge ücüm etti, yaralanğanlar olmadı.
Zafer bayramı arfesinde Moskva ve Rusiye akimiyetleri qoşma telükesizlik tedbirlerini kirsete. Rusiye regionlarınıñ sakinleri mayısnıñ 5-nden 9-na qadar mobil internet söndürile bile, dep tenbilediler.
Moskvada bazarertesi ve salı künleri qullanıcılar mobil internet işinde aqsaqlıqlarnı şikâyet etti. Mayısnıñ 5-nde kündüz Sayı nazirligi Moskvada telükesizlik maqsadınen mobil internetniñ vaqtınca blok etilüvi yekünlendi", dep bildirdi. Operatorlar aqsaqlıqlar mayısnıñ 9-na qadar devam ete bile, dep tenbiley.
Sever.Realii yazğanına köre, Sberbank onlarnen Rusiye regionınıñ sakinlerini mayısnıñ 5-nden 9-na qadar mobil internet söndürilgeni içün operatsiya yapqanda zorluq çıqa bile, den tenbiledi. Tenbiler tahminen 40 regionnıñ sakinine keldi: Arhangelsk, Leningrad, Novosibirsk, Moskva, Kirov vilâyetleri, Başqortostan, İrkutsk vilâyetleri, Ukrayinadan biñlernen kilometr mesafede olğan Habarovsk ve Zabaykalye ülkeleri.
Haberlerde aytılğanına köre, mayısnıñ 5-nden 9-na qadar bankomat ve uyğulamalar işinde, naqıt tölevler ve smsnen kod aluvda problemler ola bile.
Mayısnıñ 9-nda Rusiye paytahtında Zafer künü qısqa olacaq – arbiy tehnikasız, suvorovcılarsız ve kadetlersiz. Peterburgdaki paradda da Ukrayina Silâlı quvetleriniñ dron ücümleri ola bile dep, arbiy tehnikanı qullanmaycaqlar.
Rusiye Mudafaa nazirligi mayısnıñ 8-nden 9-na qadar barışıq aqqında bildirdi. Ukrayina prezidenti Volodımır Zelenskıy Ukrayina mayısnıñ 6-ndan yarı geceden başlap ateşkes rejimine uymağa azır, dep cevap berdi. Onıñ qayd etkenine köre, Ukrayina tek Rusiye parad keçirsin dep, barışıqnı ilân etmeycek.
Ukrayinadaki cenk sebebinden Rusiye akimiyeti uçucısızlarğa qarşı çıqmaq içün mobil internetni bazı yerlerde söndüre. Rusiyede WhatsApp ve Telegram ve VPN-servisleri blok etile. VPN blok etilüvi mayısnıñ 3-nde Sber ve diger banklarnıñ işinde aqsaqlıqlarğa yol açqandır.