Moskvağa Rusiye Federatsiyası insan aqları vekâletlisi Tatyana Moskalkovanen körüşmege ketken 16 qırımtatarı Lipetsk vilâyetiniñ Hlevenskiy rayonında İç işler nazirli bölüginden yiberildi. Bu aqta “Qırım birdemligi” cemaat teşebbüsi haber etti.
Oktâbr ayında tutulğan qırımtatar qadın-qızlarınıñ ana-babaları, halq aqsaqalları ve uquqçı Nazim Şeyhmambetovdan ibaret eyyet Moskalkovanen körüşmek içün yolğa çıqtı. Olar 39 yaşında Esma Nimetulayeva, 20 yaşında Elviza Aliyeva, 18 yaşında Nasibe Saidova ve 21 yaşında Fevziye Osmanovanıñ tutulmasınen bağlı qasevetlerini bildirmege niyetlengen ediler.
“Qırım birdemliginiñ” malümatına köre, eyyet Rusiye yol patrul hızmeti tarafından toqtatılıp, Lipetsk vilâyetiniñ Hlevenskiy rayonında İç işler nazirligi bölügine ketirildi. Umumen bölükte olar altı buçuq saat qaldı.
Tarihçı ve üç siyasiy mabüsniñ babası Şükri Seytumerov yol patrul hızmeti hadimleriniñ iddiaları “añlaşılmadı” ve olarnıñ maşinalarınen bağlı edi, dep tarif etti.
“Aytqanlarımız tam edi: Rusiye Federatsiyası insan aqları vekâletlisi Moskalkovanen körüşmege ketemiz…”, – dep qayd etti o.
Seytumerovnıñ aytqanına köre, ziyaret sebebi Moskalkovağa tutulğan qadınlarnıñ tuvğanları is etken “qorqu ve eyecannı” yetkizmek ve muracaatlarına “erli Qırım akimiyeti” tarafından bir cevap berilmegeninen bağlı qasevetlerini bildirmek ola.
Eyyet azat etilgen soñ Moskvağa doğru yolğa devam etmek niyeti aqqında bildirdi, dep yaza “Qırım birdemligi”.