Moldova sıñırındaki "Vinoğradivka" halqara keçiş noqtası vaqtınca Rusiye darbesi sebebinden çalışmay, dep bildire Ukrayina Devlet sıñır hızmeti.
Haberge köre, avgustnıñ 25-ne keçer gecesi Rusiye arbiyleri bu noqtağa "Şahednen" ücüm etti.
"Ücüm neticesinde infrastrukturası zarar kördi. Yanğınnı qurtarıcılar söndürdi. Bu keçiş noqtasından yolcu ve naqliyatnıñ keçirilüvi toqtatıldı. Bu aqta Moldova tarafı haber ete. Naqliyat keçişniñ diger noqtalarına yollanıla. Devlet sıñırından keçmege planlaştırğanda bu malümatnı köz ögüne almağa rica etemiz", – dep aytıla haberde.
Rusiye arbiyleri ücümni şimdilik izaatlamadı.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.