FSB tarafından taqip etilgen, Qırımdan köçmege mecbur etilgen ve bir qaç yıl Kreml siyasiy mabüsleriniñ azat etilmesi oğrunda küreşken qırımtatar faali İsmail Ramazanov Rusiyeniñ Ukrayinağa keniş mıqyaslı istilâsına qarşı qolunda silânen küreşe. Ukrayinanıñ şimdi "yalıñız bir yolu bar –Qırımnıñ azat etilmesi ile beraber ğalebe", o dey. Qırımtatarnıñ Kıyivniñ imayecisi olğanı aqqında bizim materialımızda.
Aqmescitli qırımtatar faali İsmail Ramazanovnıñ adı 2018 senesi Aqmescit SİZO-na tüşken zaman keniş belli oldı. Rusiye quvetçileri onı Rusiyede yasaq etilgen Zello internet radiosında "ruslarnıñ içtimaiy gruppasına qarşı duşmanlıq ve nefretniñ qozğalavına çağıruvlarda" qabaatladılar. O qabaatını tanımağan ve FSB hadimleri itiraf ettirmek içün onı köteklegenlerini bildirgen edi.
İsmail Ramazanov. Mahkeme oturışı. Qırım. 2018 senesi yanvar ayı
Aq qoruyıcılar Qırım sakininiñ taqip etilmesini siyaisiy motivli adlandırdılar. SİZO-dan çıqqan soñ İsmail Ramazanov Qırımnı terk etti. Kıyivde, cenk başlamazdan evel o, Kreml siyasiy mabüsleriniñ azat etilmesi oğrunda vatandaş areketinde faal iştirak etti. Rusiyeniñ ukrayinağa keniş mıqyaslı istilâsından soñra o, Ukrayina Silâlı quvetleriniñ territorial mudafaası sırasında Kıyivni imaye etmege ketti.
İsmail Ramazanov cenkniñ ilk künlerinde arbiy komissarlıqqa yazılmağa tırışqanını, amma uzun nevbetler sebebinden yazılıp olamağanını ayttı. Şunıñ içün o territrial mudafaa sıralarına qoşuldı ve eki ayğa yaqın anda hızmet ete.
"Yahşılıqnı imaye etmek içün arbiy tecribege malik olmaq kerek degil"
İsmail Ramazanov, Rusiye ordusı zapt etmege tırışqanı Kıyiv oğrunda ketken uruşlar vaqtında o, silâdaşları ile beraber şeerdeki rus diversion-keşfiyat gruppalarını meydanğa çıqarğanını ve diger arbiy vazifelerni eda etkenini bildirdi.
Azatlıqtan marum etilgen siyasiy mabüs olğan ağalarım Ukrayina içün dua etkenilerine eminim
"Qaç saat yuqlamağanımnı bilmeyim. Ğalebeden ve Qırımnı azat etken soñ yuqlap toyarmız. Men 2019 senesinden berli Kıyivde yaşayım. Qırımda olğan taqiplerden soñ ketecek yerim yoq edi. 2014 senesi bu strategik keri çekilüv olğanını añlay edik, amma bugün artıq çekilecek yerimiz yoq. Azatlıqtan marum etilgen siyasiy mabüs olğan ağalarım Ukrayina içün dua etkenilerine eminim", - dey İsmail Ramazanov.
Ukrayina Silâlı Quvetleriniñ territorial mudafaasında tüfek ve "Siyasiy mabüslerge azatlıq" yazısı olğan stiker, 2022 senesi
Arbiy tecribesi olmağanına baqmadan qoluna silâ almaq qararına keldi.
Menim içün vatanımıznıñ yüregini qorumaqtan ğayrı başqa çare yoq edi
"Yahşılıqnı qorumaq içün arbiy tecribege saip olmağa vacip degil. Silâ tutmağa ve duşmağa ateş açmağa bilgenimiz yeterlidir. Menim içün vatanımıznıñ yüregini qorumaqtan ğayrı başqa çare yoq edi. Çünki Kıyiv şimdi Ukrayinanıñ diger şeerleri kibi bütün medeniy dünya içün nümünedir. Ordumız ise 9-ıncı yıl devam etken cenkniñ alevinden Feniks quşu kibi ğayrıdan doğdı", - dep añlata o.
Kıyiv vilâyeti Rusiye ordusından azat etilgen soñ o, Herson yönelişindeki uruşlarda iştirak etken Ukrayina arbiyleri içün kerek olğan er şeyni temin etmege yardım ete.
İsmail Ramazanov tarafından Ukraiyna Silâlı Quvetleriniñ territrial mudafaasında patronlardan tizilgen qırımtatar tamğası
"Ğalebe tuvğan Qırımımnıñ işğalden azat etilmesidir"
Qırımlı, onıñ içün Kıyiv ve Ukrayinanı mudafaa etmek, Rusiye tarafından işğal etilgen Qırımnı da azat etmege fırsattır, dep ayta.
Şimdi Ukrayina içün tek şey bar - ğalebedir. Orklar memleketimizge yolnı untmaq kerekler
"Biz, Qırım sakinleri, işğal ve orklarnıñ tecavuzı, Qırımda yüz bergen basqılar, arbiy cinayetler ne olğanını yahşı bilemiz. Amma 2014 senesine baqqanda şimdi Ukrayina memleketimizni mudafaa etmege azır, er kes: em göñülliler, em ekimler, em arbiyler, em faaller, em de sabıq siyasiy mabüsler. Pişkin cemiyet. Ukrayina orklarnıñ ücümine qarşı tura. Qırımnıñ işğali künü aqlımda. Yazıq ki, amma o zaman qolumızğa silâ almaqnıñ çaresi yoq edi, amma biz, vatanperverler soñnuna qadar göñüllilik ettik ve o zaman Rusiye blok etken ordumızğa yardım ettik. Şimdi Ukrayina içün tek şey bar - ğalebedir. Orklar memleketimizge yolnı untmaq kerekler", - dey o.
Ukrayin tilinde "Qırım" sözü
İsmail Ramazanov, Qırımnıñ işğalden azat etilmesini ve "bütün halqlarnıñ Kremlniñ zulumından" azat etilmesini Rusiyeniñ Ukrayinağa qarşı cenkinde kerçek ğalebe saya.
İnsanlıq, Putin rejimi birinci ve soñki olmağanını, halqlarnı Kremlniñ zulumından azat etmek kerek olğanını añlamalı
"Menim içün ğalebe elbette tuvğan Qırımımnıñ işğalden azat etilmesidir, orklarnıñ halqımızğa ketirgen bütün kederler, basqılar, analarımznıñ ve balalarımıznıñ közyaşları içün cevap bermesidir. Rusiyede akimiyetniñ deñişmesi vaziyetni deñiştirmez. O, bütün silâsından marum etilmeli. İnsanlıq, Putin rejimi birinci ve soñki olmağanını, halqlarnı Kremlniñ zulumından azat etmek kerek olğanını añlamalı. Ümüt etem ki, menim qardaşlarım - çeçenler, kazan tatarları ve tamır halqlar mustaqillik qazanırlar ve Mordor bütünley dağılır", - dey İsmail.
İsmail Ramazanov, böyle olmasa, Ukrayina Rusiyeniñ ücümlerine qarşı "Allah istegeni qadar" küreşecegeni saya.
MALÜMAT: Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete. Mesken rayonlarğa top, topçu ateş reaktiv sistemaları ve ballistik raketa qullanıluvınen ateş açıla.
ABD ve AB memleketleri olğan bir sıra ğarbiy memleket Rusiyege qarşı sanktsiyalarnı sertleştirdi ve Rusiyeniñ Ukrayinada yapqan arbiy areketlerini takbih etti.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.