Ukrayina Mudafaa nazirliginiñ Baş istihbarat idaresinde, işğal etilgen Qırımnı işğalden azat etip, anda "qanuniy ukrayin akimiyetini" qaytarmaq kerek olğanı aqqında bildirdiler. Bunı Freedom televizion kanalınıñ yaynında Ukrayina istihbaratınıñ temsilcisi Andriy Yusov ayttı.
"Anda sulh ve nizam olması içün yarımdanı işğalden azat etmek ve anda qanuniy ukrayin akimiyetini qaytarmaq kerek. Yani, Qırımnı tuvğan Ukrayinasına qaytarmaq. Bu mıtlaq yaqın kelecekte olacaq. Şunıñ içün Rusiye içün çalışqanlarnıñ episiniñ yaqın kelecekte ukrayin Qırımınıñ toprağını terk etmesi daa yahşıdır", - dedi Yusov.
O, yarımadadaki Rusiye komandanlığı ve işğal memuriyeti köçmesizlikni "faal sata" ve Qırımdan ailelerini çıqara dep bildirdi.
Martnıñ 24-nde Rusiye Telükesizlik şurasınıñ reis muavini, sabıq Rusiye przeidenti Dmitriy Medvedev, Ukrayina Silâlı Quvetleriniñ Qırımğa ücümi özek silâsını qullanmağa sebep olacaq, dep bildirdi.
Fevralniñ 24-nde Ukrayina prezidenti Volodımır Zelenskıy memleket Qırımnıñ işğalden qurtarıluvına azırlana, dep bildirdi.
Ukrayina prezidenti ofisiniñ yolbaşçı muavini İgor Jovkva Qırım.Aqiqatqa intervyü berip, Ukrayinanıñ er angi toprağınen bağlı uzlaşuvlar bir vaqıt Rusiyenen muzakere etilmeycek, dep ayttı. Onıñ qayd etkenine köre, kimse Qırım Kıyivniñ kontroli altına nasıl qaytarılır aytıp olamay, amma «qaytarılacaq». Onıñ aytqanına köre, «(Qırımnı qaytaruv) diplomatik yoluna arbiy vastalar» qoşula bile.
ABD devlet kâtibiniñ muavini Viktoriya Nuladn Amerika Birleşken Devletleri Ukrayinanıñ işğal etilgen Qırımdaki Rusiye arbiy obyektlerine darbe endirmesine qoltuta, dep bildirdi. Buña cevap olaraq Peskov Nulandnıñ Qırım darbeleri lafları «Washingtonnıñ halqara kerginlikniñ baş provokator rolüni qayd ete», dep bildirdi.
Bıltır dekabr ayınıñ soñunda Ukrayina arbiy istihbarat yolbaşçısı Kırılo Budanov Ukrayina Qırımnı em küç, em diplomatiyanen keri alacaq, dep bildirdi.
Ukrayina Silâlı quvetleriniñ baş komandanı Valeriy Zalujnıy Qırımnı işğalden azat etüv imkânlarına qıymet kesip, birinciden Zaporijjâ vilâyetiniñ Melitopol şeerini kontrol altına almaq kerek, dep bildirdi.
Avropada ABD ordusınıñ sabıq komandanı Ben Hoces Ukrayına Qırımnı 2023 senesi yaznıñ soñuna qadar azat etecek, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.