Qırımtatar Milliy Meclisiniñ Prezidiumı Rusiye akimiyetiniñ Orta küzniñ 31-nden Boşnıñ 1-ne qadar ilhaq etilgen Bağçasaraydaki Hansarayda XIX asırnıñ Rusiye imperatorlıq siyasetiniñ şerefine bağışlanğan kütleviy tedbirlerni keçirmek planlarını takbih etkenini bildirdi. Mütenasip beyanatnı Orta küzniñ 30-nda Meclis reisi Refat Çubarov imzaladı.
Hansaray, dünya qıymeti olğan tarih ve medeniyet abidesidir, o, Ukrayina tarafından UNESCO Dünya mirası cedveline kirsetilgen. Rusiye akimiyeti anda "Rusiye ordusınıñ lagerini", "Qırımda yerleşken polknıñ yaşayışını ğayrıdan tiklevni", "1853 senesi Qırım cenki" sergisini ve Rusiyeniñ "Halq birligi künü"ne bağışlanğan diger tedbirlerni keçirmekni planlaştıra.
"XIX-XX asırlarda Qırımda Rusiyeniñ tamır Qırımtatar halqını sert bir şekilde taqip etüv ve işğal etilgen Qırımnı Rusiye kolonistleri faal sürette yerleştirüvinen bağlı müstemleke siyasetini yükseltmek içün keçirilgen bütün bu tedbirlerniñ "Halq birligi künü" ile bağlı olması hususan siniktir", — dep aytıla beyanatta.
Meclis Rusiye Federatsiyasınıñ areketlerini Qırımtatar devletçiligi (Qırım Hanlığı) unikal abidesini Rusiye imperiyasınıñ tamır halqına qarşı yapqan cinayetlerini kötermek ve Qırımtatarlarğa nisbeten zemaneviy siyasetini aqlamaq içün qullanmaq ıntıluvı olaraq tanıy.
Prezidium hatırlattı ki, RF işğalci devlet olaraq Ukrayinanıñ medeniy miras obyektlerine suveren aqlarnı elde etmey.
Meclis Ukraina Tış işler nazirligine muracaat etip, UNESCO baş müdiri ve icra şurasınıñ yolbaşçısına resmiy narazılıq notasını yollamağa, em de Qırımdaki vaziyetniñ monitoringini baqmaq içün icra şurasınıñ nevbetten tış sessiyasını teşkil etmekni rica etti. Teşkilât UNESCO, milliy müzeyler ve halqara medeniy toplulıqnı Qırım tarihınıñ bozuluvına qarşılıq köstermege çağırdı.
Ukrayina akimiyeti ve UNESCO-nıñ resmiy cevabı şimdilik yoq.